HİDROGEN MÜHƏRRİKLİ AVTOMOBİL SINAQDAN KEÇİRİLMİŞDİR
“Daymler-Kraysler” korporasiyası hidrogen mühərrikli minik avtomobilini Amerika yollarında uğurla sınaqdan keçirmişdir. Kompakt “Mersedes-bens” bazasında yaradılmış beşyerlik “Nikar-5” avtomobili San-Fransiskodan Vaşinqtonadək olan 5 min 200 kilometrlik yolu 16 günə qət etmişdir. Doğrudur, avtomobil cəmi 85 saat hərəkətdə olmuş, orta sürəti saatda 60 kilometr təşkil etmişdir. Lakin “Nikar-5” çox asanlıqla sürəti saatda 144 kilometrə çatdıra bilir. Bu layihənin rəhbərlərindən biri Ferdinand Penik jurnalistlərə demişdir: ”Gizlətmirəm, biz bu səyahətə başlayanda heç də tam arxayın deyildik. Lakin gözlədiyimizdən də artıq nəticələr əldə etdik. Bu, ənənəvi neft məhsullarından imtina etməyə yönəlmiş yeni ideyanın həyata keçirilməsində irəliyə doğru böyük addımdır”.
İTAR-TASS-ın verdiyi xəbərə görə, avtomobilin mühərriki kimyəvi reaksiya nəticəsində metil spirtindən alınan hidrogenlə işləyir. 64 kilometrdə orta hesabla 3,8 litr metanol sərf olunur. Penik demişdir: ”Bu göstərici daxili yanacaq mühərriki qoyulmuş müasir avtomobillərin əksəriyyətindən aşağıdır. Mühərrikdən çıxan qazın tərkibindəki zərərli qarışıqların miqdarına görə isə hətta müqayisə etmək olmaz”.
Bölmənin digər xəbərləri
