HONKONQ ALİMLƏRİ ATİPİK PNEVMONİYAYA QALİB GƏLƏ BİLƏN MOLEKULLARI TAPMIŞLAR

22.09.2004 [17:08]
Çap et
A⁺ A^-

AZƏRTAC “Novosti” agentliyinə istinadla xəbər verir ki, Honkonq Universitetinin alimləri atipik pnevmoniyaya qalib gələ bilən molekulları tapmışlar. Onlar yeni üsuldan istifadə edərək, atipik pnevmoniya virusunu 50 mindən çox molekul birləşməsi ilə tutuşdurmuşlar. Aydın olmuşdur ki, 104 molekul virusa səmərəli müqavimət göstərmək iqtidarındadır. Alimlər tezliklə heyvanlarda, əgər xəstəlik yenidən baş qaldırarsa, insanlar üzərində təcrübə aparmaq fikrindədirlər.

Honkonq Universitetinin professoru Riçard Kao demişdir: “Sonra biz dərman hazırlayıb-hazırlamamaq qərarına gələcəyik. Bu, atipik pnevmoniyanın təkrar qayıtmasından və təcrübəni davam etdirmək üçün vəsait tapa biləcəyimizdən asılıdır”.

Onun sözlərinə görə, bu, kimyəvi genetikanın yoluxucu xəstəliklərlə mübarizə aparmağa qadir olduğu yeganə haldır.

R.Kao demişdir:”Dünyada yeni naməlum virus aşkara çıxarsa, biz 50 min molekuldan ibarət məlumat bazamızdan istifadə edərək, virusun hüceyrələri dağıtmasına mane olan molekulları taparıq. Ümidvaram ki, gələn dəfə biz daha çevik tərpənərək, ən qısa müddət ərzində lazımi dərmanı hazırlayacağıq”.

Xatırladaq ki, ötən il Honkonqda atipik pnevmoniyaya tutulmuş 1755 adamdan 299-u ölmüşdür.