“Huawei” şirkəti Çexiyanın Baş nazirindən narazıdır
Praqa, 22 dekabr, AZƏRTAC
Çexiyanın Baş naziri Andrey Babiş Çinin “Huawei” şirkətinin istehsal etdiyi texnikanın və proqram təminatının kibernetik təhlükəsizlik baxımından problemli olduğunu bəyan edib. Bununla əlaqədar, şirkətin menecerləri Çexiya hökumətindən tələb ediblər ki, Baş nazir həmin ittihamların əsaslı olmasını sübut etsin.
AZƏRTAC xəbər verir ki, Çexiya hökumətinin başçısı bir neçə gün bundan əvvəl Nazirlər Kabinetinin üzvlərinə Çinin “Huawei” və ZTE firmalarının məhsullarından istifadəyə son qoyulmasını təklif edib. Kibernetik və informasiya təhlükəsizliyi üzrə milli idarə həmin məhsullardan istifadənin riskli olmasını bəyan edib. Bu xəbərdarlıq, ilk növbədə, yüksəkvəzifəli şəxslərə və ali rəhbərlərə aiddir.
Beləliklə, ABŞ, Avstraliya və Yeni Zelandiyadan sonra Çexiya “Huawei” və ZTE firmalarının məhsullarının tətbiqinin məhdudlaşdırılacağı dördüncü ölkə olub.
“Huawei” şirkətinin menecmenti öz nüfuzunu təsdiqləmək niyyətindədir. Bununla əlaqədar ilk addım kimi şirkət Praqanın irəli sürdüyü ittihamların sübut olunmasını tələb edir.
Pərvanə Qarayeva
AZƏRTAC-ın xüsusi müxbiri
Praqa
Bölmənin digər xəbərləri
