Hüseyn Rəhimli cüdo üzrə dünya çempionatının üçüncü günü mübarizəni dayandırıb
Bakı, 26 avqust, AZƏRTAC
Azərbaycan yığmasının üzvü Hüseyn Rəhimli Astanada keçirilən cüdo üzrə dünya çempionatının üçüncü günü mübarizəni dayandırıb.
Avqustun 26-da dünya çempionatında qadınlar arasında 57 kiloqram, kişilər arasında 73 kiloqram çəki dərəcələrində idmançılar yarışıblar. Azərbaycanı təmsil edən yeganə cüdoçu, Universiadanın bürünc mükafatçısı Hüseyn Rəhimli start görüşündə latviyalı Dmitriys Fedoseyenkovsa qalib gəlib, sonra əfqanıstanlı Rəşad Arian üzərində təmiz qələbə qazanıb, amma sloveniyalı Rok Draksiçə məğlub olub.
Bugünkü yarışlarda qadınlar arasında Kaori Matsumoto (57 kq), kişilər arasında Şoxey Ono (73 kq) dünya çempionu olublar. Onların hər ikisi Yaponiyanı təmsil edir.
Avqustun 27-də Azərbaycan yığmasının digər üzvləri medallar uğrunda mübarizəni davam etdirəcəklər.
Xatırladaq ki, avqustun 24-də Astananın “Alau” Buz Sarayında cüdo üzrə dünya çempionatı start götürüb. Çempionatda 120 ölkədən 729 idmançı mübarizə aparır. Yarışlar kişilər və qadınlar arasında yeddi çəki dərəcəsi üzrə keçirilir. Çempionatda komanda birinciliyi də keçiriləcək.
Bölmənin digər xəbərləri
