İddiaçılar turniri: Şahmatçımız Şəhriyar Məmmədyarov ikinci turda heç-heçə edib
Bakı, 12 mart, AZƏRTAC
Martın 11-də Berlində şahmat üzrə iddiaçılar turnirində ikinci turun oyunları keçirilib.
AZƏRTAC xəbər verir ki, turnirin reytinq favoriti olan Azərbaycan şahmatçısı Şəhriyar Məmmədyarov ikinci turda Ermənistan təmsilçisi Levon Aronyanla qarşılaşıb. Oyun heç-heçə yekunlaşıb.
İkinci turun digər oyunlarında isə Rusiya idmançısı Aleksandr Qrişuk ABŞ təmsilçisi Uesli Soya qalib gəlib. Fabiano Karuana (ABŞ) - Dinq Lijen (Çin) və Vladimir Kramnik - Sergey Karyakin (hər ikisi Rusiya) qarşılaşmalarında şahmatçılar xalları yarı bölüblər.
Hesabında 1,5 xal olan Vladimir Kramnik, Şəhriyar Məmmədyarov və Fabiano Karuana 1-3-cü yerləri bölüşürlər. Levon Aronyan, Dinq Lijen və Aleksandr Qrişuk 1 xalla 4-6-cı pillədə qərarlaşıblar. Sergey Karyakin 0,5 xalla yeddinci, hesabında xal olmayan Uesli So isə sonuncu pillədə yer alıb.
Martın 28-dək davam edəcək iddiaçılar turnirinin qalibi dünya çempionluğu uğrunda görüşdə bu titulun hazırkı sahibi norveçli Maqnus Karlsen ilə üz-üzə gələcək.
Bölmənin digər xəbərləri
