İƏT Müstəqil Daimi İnsan Hüquqları Komissiyası Əfqanıstanla bağlı bəyanat yayıb
Qahirə, 18 avqust, AZƏRTAC
İslam Əməkdaşlıq Təşkilatı (İƏT) Müstəqil Daimi İnsan Hüquqları Komissiyası (IPHRC) öz bəyanatında Əfqanıstanda insan hüquqları və humanitar vəziyyəti yaxından izlədiyini bildirib.
AZƏRTAC xəbər verir ki, komissiyanın bəyanatında Əfqanıstanda daxili vəziyyətin sabitləşməsi, xaos və qanun pozuntularına son qoyulması, demokratik institutların bərpası, bütün hallarda fundamental insan hüquq və azadlıqlarının təmin edilməsi, həqiqi İslam dəyərlərinə ehtiram göstərilməsinin zəruriliyi vurğulanıb.
IPHRC bildirib ki, Talibanın Kabili ələ keçirməsindən sonra əfqan xalqının və Əfqanıstanda olan əcnəbilərin həyatı və təhlükəsizliyi üçün yaranmış təhdidlər aradan qaldırılmalı, xeyirxahlığı öyrədən İslam dininə uyğun şəkildə insan hüquqları və ləyaqəti qorunmalıdır. Eyni zamanda, COVID-19 pandemiyası şəraitində Əfqanıstanda yaranmış ağır vəziyyət də nəzərə alınmalıdır. Bəyanatın sonunda BMT və İƏT-in əfqan cəmiyyəti illə inklüziv dialoqu vasitəsilə, ilk növbədə, qadınların, uşaqların, məcburi köçkünlərin, əlillərin, təhsil və media işçilərinin humanitar ehtiyaclarının təmin edilməsi barədə çağırış yer alıb.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
