İltizam Yusifov: Azərbaycanda yeni idarəetmə sistemi modern çağırışlara cavab verir
Bakı, 30 aprel, AZƏRTAC
ADA Universitetində keçirilən “Cənubi Qafqaz: İnkişaf və əməkdaşlıq” mövzusunda beynəlxalq konfrans regionun bu günü və gələcəyi ilə bağlı bir sıra məsələlərə aydınlıq gətirilməsi baxımdan mühüm bir tədbir idi.
Konfransa həm yerli həm beynəlxalq marağın yüksək olması bir daha onu deməyə əsas verir ki, regionun aparıcı qüvvəsi olan Azərbaycan siyasi qərarların qəbulunda və həyata keçirilməsində önəmli yer tutur.
Bu fikirləri AZƏRTAC-a açıqlamasında Milli Məclisin deputatı İltizam Yusifov söyləyib.
O qeyd edib ki, beynəlxalq konfransda çıxış edən Azərbaycan Prezidenti İlham Əliyevin toxunduğu məsələlər mövcud reallıqdan və gələcək planlardan xəbər verir. Dövlətimizin başçısı istər postmüharibə dövründə görülən işlərdən, istər sülh müqaviləsi haqqında, istərsə də mavi yanacağa artan tələbatın ödənilməsində Azərbaycanın görəcəyi işlər barədə konseptual yanaşmanı, eyni zamanda, bir sıra prioritetləri də açıqlayıb.
“Prezident İlham Əliyevin çıxışında Azərbaycanın yeni idarəçilik metodunun sınaqdan çıxarıldığını bəyan etməsi qarşıdakı dövr ərzində regional idarəçiliyin çağırışlarına cavab verən sistemin qurulmasının vacibliyindən xəbər verir. Məlumdur ki, mövcud idarəçilik sistemi uzun illərdən bəri formalaşıb. Həyata keçirilən islahatlar nəticəsində bu sahədə də kifayət qədər işlər görülüb. Görülən işlərin nəticəsidir ki, bir zamanlar əlçatmaz məmurlar indı xalqın arasındadırlar. Xalqın problemini dinləyir, onların həlli istiqamətində səy göstərirlər. Prosesə nazirliklərin cəlb olunması, yerli icra hakimiyyəti başçılarının vətəndaşlarla keçirdiyi görüşlər ötən dövrlərlə müqayisədə vətəndaş-məmur münasibətlərinin müsbət inkişafına gətirib çıxarıb. Vətəndaşlar mövcud problemləri ilə bağlı aidiyyəti qurumlara artıq çəkinmədən müraciət edir, bu müraciətlər operativ şəkildə cavablandırılır və həll olunur. Aparılan araşdırmalar da onu deməyə əsas verir ki, qurulan münasibətlər fonunda vətəndaşların sosial problemləri minimum səviyyəyə qədər enib. Bir zamanlar qaz, su, elektrik enerjisi, yol infrastrukturu ilə bağlı həllini gözləyən məsələlər artıq tarixin arxivinə qovuşur”, - deyə İltizam Yusifov vurğulayıb.
Onun sözlərinə görə, qarşımızda dövrün tələblərinə uyğun olaraq yeni idarəetmə sisteminin tətbiqi dayanır. Prezident İlham Əliyevin də qeyd etdiyi kimi, bu sistemin həyata keçirilməsi Azərbaycanın daha da inkişafına zəmin yaradacaq. Eyni zamanda, bu idarəetmə sistemi Azərbaycanın beynəlxalq nüfuzunun yüksəlməsinə gətirib çıxaracaq. İşğaldan azad olunan ərazilərdə tətbiq olunan, aradan keçən müddət ərzində özünü doğruldan yeni idarəetmə sisteminin bir sıra özəlliyi var. Bu sistem vətəndaşlara xidmətin yüksəldilməsinə hesablanıb.
“Yerli idarəetmə sistemində icra hakimiyyətlərinin yerini Azərbaycan Respublikası Prezidentinin xüsusi nümayəndələrinin əvəz etməsi vətəndaşların rifah halının daha da yüksəldilməsinə xidmət edir. Azərbaycan Respublikası Prezidentinin xüsusi nümayəndəlikləri haqqında Əsasnamə bu institutun təkmil fəaliyyəti üçün bir çox aspektləri özündə ehtiva edir. Əsasnamənin bəndləri ilə tanışlıqdan sonra məlum olur ki, müvafiq ərazidə əhalinin rifahının yaxşılaşdırılmasına nail olunması üçün müvafiq dövlət proqramları layihələrinin hazırlanmasına və təsdiq edilmiş proqramların icrasına ciddi nəzarət mexanizmi həyata keçiriləcək. Həyata keçirilən nəzarət rüşvət və korrupsiya amillərinin azalmasına gətirib çıxaracaq. Məlumdur ki, bu vaxta kimi bir sıra rayon icra hakimiyyətlərinin bəzi xoşagəlməz əməlləri ilə bağlı iş aparılıb. Rüşvət və səhv idarəçilik həyata keçirən yerli icra hakimiyyəti orqanlarının başçıları cəzalandırılıb. Görünən odur ki, yeni idarəetmə sistemi bu kimi halların qarşısını almaq baxımdan mühüm sənəddir və yaxın zamanda bu üsulun tətbiqinin müsbət təzahürlərini hər birimiz görəcək və real həyatımızda bunu hiss edəcəyik”, - deyən deputat fikirlərini yekunlaşdırıb.
Bölmənin digər xəbərləri
