İndi bizim qarşımızda böyük çağırışlar dayanır
Bakı, 8 noyabr, AZƏRTAC
Azərbaycan xalqı 8 Noyabr - Zəfər Gününü böyük coşqu və təntənə ilə qeyd edir. Çünki bu möhtəşəm bayramı doğma Xankəndimiz, Xocalımız, bütün Qarabağımız, yəni bütöv Azərbaycan qeyd edir. Üç il öncə Vətən müharibəsi ilə dövlətimizin qətiyyəti, ordumuzun gücü, Müzəffər Ali Baş Komandanımızın əzəmətli sərkərdəliyi, xalqımızın birliyi ilə erməni işğalına son qoyuldu. Azərbaycan dövləti qalib dövlət, xalqımız isə qalib xalq kimi dünya tarixinə öz möhürünü vurdu.
Bu fikirləri AZƏRTAC-a Milli Məclisin deputatı Fatma Yıldırım deyib.
Deputat bildirib ki, biz torpaqlarımızın erməni işğalından azad olunması sevincini məhz Müzəffər Ali Baş Komandanımızın rəhbərliyi ilə qəhrəman əsgərlərimizin, döyüşçülərimizin sayəsində yaşayırıq. “Zəfəri bizə yaşadan şəhidlərimizin ruhu qarşısında baş əyir, qazilərə Allahdan şəfa diləyir, qəhrəman əsgər və zabitlərimizlə, döyüşlərdə iştirak edən hər bir həmvətənimizlə qürur duyuruq. Bu oğulları böyüdüb boya başa çatdıran ana-atalarımıza minnətdarıq. Vətən müharibəsində Bərdəmizin də oğulları böyük şücaət göstərdilər. Yüzlərlə bərdəli könüllü olaraq döyüşə getdi, müqəddəs torpaqlarımızın erməni işğalından azadlığı uğrunda mərdliklə vuruşdular", - deyə F.Yıldırım qeyd edib.
Vətən müharibəsində erməni terrorundan ən çox zərər görən regionlardan birinin də döyüş bölgəsindən xeyli uzaqda yerləşən və təmsil etdiyi Bərdə rayonunun olduğunu deyən deputat diqqətə çatdırıb ki, Bərdədə xeyli sayda dinc insan bu terror əməllərinin qurbanı olub: Amma belə qanlı əməllər rayon əhalisini qətiyyən qorxutmadı. Tarixən qəhrəmanlar yurdu olan Bərdənin sakinləri bu dəfə də düşmənin qarşısında mərdliklə dayandılar.
Prezidentimiz İlham Əliyevin həyata keçirdiyi güclü dövlət, güclü ordu strategiyası torpaqlarımızın işğaldan azad olmasının ən başlıca səbəbidir. Azərbaycan həm döyüş meydanında, həm danışıqlar masası arxasında qələbə qazandı. Bütün dünya gördü ki, Azərbaycan xalqı heç vaxt məğlubiyyətlə barışmaq niyyətində deyil və barışmadı da. Prezident İlham Əliyevin Müzəffər Ali Baş Komandan kimi gərgin əməyinin nəticəsində Azərbaycan ərazi bütövlüyünə qovuşdu, xalqımız dünyada mübariz, döyüşkən xalq kimi tanındı”.
F.Yıldırım əlavə edib ki, müharibə dövründə hamı bir yumruq kimi birləşdi. “Dəmir yumruq” milli birliyimizin və gücümüzün rəmzi oldu. Dünyanın müxtəlif ölkələrində yaşayan azərbaycanlılar, habelə Azərbaycanın haqq işinə dəstək verən digər xalqların nümayəndələri erməni lobbisinin çirkin kampaniyalarına qarşı fədakarlıqla mübarizə apardılar. Etnik və dini mənsubiyyətindən asılı olmayaraq ölkəmizin bütün vətəndaşları görünməmiş həmrəylik nümayiş etdirdi, ön və arxa cəbhədə sarsılmaz birlik yarandı. Bu birlik və həmrəylik haqlı olaraq “Dəmir yumruq” kimi səciyyələndirilir. Eləcə də, Vətən müharibəsi zamanı siyasi partiyaların Ali Baş Komandan İlham Əliyevə dəstək ifadə edən birgə bəyanat və müraciətlər imzalaması milli məsələlərdə ölkədə hər hansı fikir ayrılığının istisna olunduğunu göstərdi.
"Məhz bu milli birliyin nəticəsidir ki, son 3 ildə qələbələrimiz davamlı oldu. Bu il aprelin 23-də “Laçın” sərhəd-buraxılış məntəqəsinin qurulması böyük Şuşa Zəfərindən sonra əldə edilmiş ən böyük və əhəmiyyətli hərbi-siyasi qələbə kimi Azərbaycan tarixinə qızıl hərflərlə yazıldı. Eləcə də, bu il sentyabrın 19-20-də ordumuzun Qarabağda keçirdiyi lokal antiterror tədbirləri nəticəsində separatçı rejim təslim oldu. Bununla da, suverenliyimiz tam təmin olundu. Oktyabrın 15-də Xankəndi şəhərinin mərkəzi meydanında, Xocalıda Azərbaycan Bayrağının ucaldılması milli birliyimizin təntənəsinə çevrildi.
İndi bizim qarşımızda böyük çağırışlar dayanır. Bunlardan ən birincisi talan edilmiş yurdlarımızı bərpa etmək, həmin torpaqlara yenidən həyatı qaytarmaqdır", - deyə F.Yıldırım vurğulayıb.
Deputat bildirib ki, döyüş meydanında düşməni diz çökdürən və kapitulyasiyaya məruz qoyan qalib Azərbaycan bərpa və quruculuq işlərini də qısa müddətdə və yüksək səviyyədə həyata keçirmək əzmindədir. Keçmiş məcburi köçkünlərimiz öz doğma yurdlarının azad olunmasının sevincini yaşayırlar. Yurdlarına qayıdan insanlar həyəcan, sevinc və qürur hissləri keçirirlər. Onların hamısı uzun müddət qayıdış həsrəti ilə yaşayıblar. Hətta həmin torpaqları görməyən, işğal dövründə dünyaya göz açmış gənc nəsil də böyük həvəslə həmin torpaqlara qayıdırlar. Bütün bunlar xalqımızın öz torpağına qırılmaz tellərlə bağlılığının, Vətənə məhəbbətinin ifadəsidir.
Bölmənin digər xəbərləri
