İndiyədək Bakı–Tbilisi–Ceyhan kəməri ilə 488 milyon ton neft daşınıb
Bakı, 6 avqust, AZƏRTAC
Cari ilin ilk iki rübündə Bakı-Tbilisi-Ceyhan əsas ixrac neft boru kəməri (BTC) vasitəsilə 13 milyon tondan çox (99 milyon barel) xam neft ixrac edilib və həmin neft Ceyhan limanında 137 tankerə yüklənib.
“BP Azerbaijan” şirkətindən AZƏRTAC-a verilən məlumata görə, altı ayda BTC üzrə əməliyyat xərclərinə 69 milyon dollardan çox, əsaslı xərclərə isə təqribən 12 milyon dollar sərf olunub.
1768 kilometr uzunluğa malik BTC boru kəməri 2006-cı ilin iyunundan istismardadır. Həmin vaxtdan bu ilin ikinci rübünün sonunadək BTC ilə ümumilikdə təqribən 488 milyon ton (təxminən 3,66 milyard barel) xam neft nəql olunub və Ceyhan limanında 4796 tankerə yüklənərək dünya bazarına göndərilib.
Hazırda BTC boru kəməri Azərbaycandan əsasən “Azəri-Çıraq-Günəşli” (AÇG) nefti və “Şahdəniz” kondensatı daşıyır. Bundan əlavə, boru kəməri vasitəsilə digər xam neft və kondensat həcmləri də, o cümlədən Türkmənistan, Rusiya və Qazaxıstan nefti nəql olunur.
“BTC Co.”nun səhmdarları belədir: BP 30,1 faiz, “AzBTC” 25 faiz, MOL 8,9 faiz, “Equinor” 8,71 faiz, “TPAO” 6,53 faiz, “Eni” 5 faiz, “Total” 5 faiz, “Itochu” 3,4 faiz, “Inpex” 2,5 faiz, “ExxonMobil” 2,5 faiz və “ONGC (BTC) Limited” 2,36 faiz.
Bölmənin digər xəbərləri
