İNFORMASİYA TEXNOLOGİYALARININ İNKİŞAF VƏZİYYƏTİ VƏ PERSPEKTİVLƏRİNƏ DAİR SEMİNAR KEÇİRİLMİŞDİR
Rabitə və İnformasiya Texnologiyaları Nazirliyi Bakı Dövlət Universitetində ölkədə informasiya-kommunikasiya texnologiyalarının (İKT) inkişaf vəziyyəti və perspektivləri ilə bağlı seminar təşkil etmişdir. İnformaisya texnologiyaları ekspertlərinin iştirakı ilə keçirilən tədbirdə Azərbaycanda İKT sektorunun inkişafı və perspektivləri müzakirə olunmuşdur.
Giriş sözü ilə çıxış edən Bakı Dövlət Universitetinin rektoru, Milli Məclisin deputatı akademik Abel Məhərrəmov Azərbaycanın yüksək templi iqtisadi artımı barədə danışmış, müasir texnologiyaların tətbiqinin vacibliyini vurğulamışdır. Rektor bu tədbirlərin həm paytaxtda, həm də regionlarda müntəzəm keçirilməsinin zəruriliyini qeyd etmişdir.
Sonra nazirliyin əməkdaşları və İKT sahəsi üzrə milli ekspertlər iştirakçılara Azərbaycanda formalaşan informasiya cəmiyyəti və elektron hökumət, elektron imza və elektron ticarət, İKT-nin təhsildə tətbiqi barədə məruzələr oxumuşlar.
Seminarda mövzu ilə bağlı müzakirələr aparılmış, iştirakçıların sualları cavablandırılmışdır.
Azərbaycan Dövlət İqtisad Universitetində, həmçinin Quba, Lənkəran, Tərtər, Naxçıvan və digər rayonlarda da bu mövzuda seminarlar keçirilmişdir.
Bölmənin digər xəbərləri
