İordaniya mətbuatında Qərbi Azərbaycan irsi haqqında məqalə dərc edilib
Qahirə, 23 may, AZƏRTAC
İordaniya mətbuatında Qərbi Azərbaycanın mədəniyyəti, tarixi haqqında məqalə dərc edilib.
AZƏRTAC xəbər verir ki, “Əmmandan Şuşayadək... Qərbi Azərbaycan məsələsində ədaləti tələb edən iordaniyalı bir səs” sərlövhəli məqalənin müəllifi iordaniyalı müşavir və “Yaxın Şərqdə Sülh Mədəniyyəti Birliyi”nin rəhbəri Məhəmməd əl-Məlkavidir.
Məqalədə vurğulanır ki, Qərbi Azərbaycan icmasını öz ata-baba torpaqlarından ayırmaq, onların minilliklərə söykənən mədəniyyətini, kollektiv yaddaşını unutdurmağa, kimliklərini yox etməyə çalışmaq qəbuledilməzdir. Belə ki, ötən əsrdə davamlı olaraq haqsızlıqlara, deportasiyalara məruz qalsalar da, Qərbi Azərbaycan icması öz torpaqlarına qayıtmaq və problemlərinin həllində ədalət istəyirlər.
Məqalədə Qərbi Azərbaycanın tarixinə, mədəni irsinə toxunan iordaniyalı sülh səfiri və “Yaxın Şərqdə Sülh Mədəniyyəti Birliyi”nin rəhbəri əl-Məlkavi Qərbi azərbaycanlılarla tam həmrəy olduğunu bildirir, onların zaman keçsə də, qüvvədən düşməyən qanuni hüququnu – öz torpaqlarına qayıtmaq və qəsdən silinmiş, təhrif edilmiş və mənimsənilmiş dərin tarixi irslərini qorumaq hüququnu müdafiə edir.
Qeyd olunur ki, Azərbaycanın İordaniya Haşimilər Krallığındakı səfirliyinin təşkilatçılığı və Qərbi Azərbaycan İcmasının dəstəyi ilə Əmman şəhərində “Qərbi Azərbaycan mədəni irsinin izi ilə” mövzusunda elmi-praktik konfransda və Qərbi Azərbaycana aid maddi mədəniyyət nümunələrindən ibarət “Qərbi Azərbaycan mədəniyyəti” adlı sərgidə təqdim olunan sənədlər etnik və mədəni təmizləmə kampaniyasının sistemli və planlı şəkildə həyata keçirildiyini bir daha təsdiqləyir.
Diqqətə çatdırılır ki, bu qərəzli siyasət nəticəsində azərbaycanlıların sıx məskunlaşdığı yaşayış məskənləri, dini və mədəni irs, eləcə də memarlıq abidələri məhv edilmişdir.
Müəllif vurğulayır ki, Qərbi Azərbaycanın mədəni kimliyi ötəri siyasi məsələ deyil. Mədəni irs beynəlxalq qanunlar və konvensiyalarla qorunur. Bu səbəbdən, Qərbi Azərbaycandan didərgin salınmış insanların qayıdış hüququ emosional çağırışlar deyil, BMT Nizamnaməsi və Ümumdünya İnsan Hüquqları Bəyannaməsinə əsaslanan qanuni və humanist tələbdir.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
