İRAN DÜNYA BİRLİYİNİ ONUN URANI SAFLAŞDIRMAQ PROQRAMINI HƏYATA KEÇİRMƏK HÜQUQUNU TANIMAĞA ÇAĞIRIR

22.09.2004 [23:34]
Çap et
A⁺ A^-

AZƏRTAC-ın İTAR-TASS agentliyindən aldığı xəbərdə deyilir ki, İran Prezidenti Məhəmməd Xatəmi dünya birliyinə müraciət edərək, İslam Respublikasının uranı saflaşdırmaq proqramını həyata keçirmək hüququnu tanımağa çağırmışdır. O bir daha bəyan etmişdir ki, İranın nüvə proqramı ancaq dinc məqsədlər daşıyır və onun ölkəsi atom silahı yaratmaq niyyətində deyildir.

M.Xatəmi Nazirlər Kabinetinin iclasından sonra bildirmişdir: “Biz uranı saflaşdırmaq hüququmuzun beynəlxalq birlik tərəfindən tanınmasını açıq şəkildə tələb edirik, çünki bu, nüvə silahının yayılmaması haqqında müqavilənin müddəalarına uyğun olan qanuni hüququmuzdur. Bu hüquq tanınsa, geniş əməkdaşlığa yol açacaqdır”.

Xatəmi demişdir ki, atom enerjisindən dinc məqsədlərlə istifadə sahəsində texnologiyaların inkişafına dair proqram Beynəlxalq Atom Enerjisi Agentliyi ilə (BAEA) əməkdaşlığın dayandırılmasına gətirib çıxarsa da, İran bu proqramın gerçəkləşdirilməsini davam etdirəcəkdir.

Xatırladaq ki, ötən şənbə günü BAEA İrandan tələb etmişdir ki, uranın saflaşdırılması sahəsində apardığı işləri, o cümlədən nüvə yanacağını saflaşdırmaq üçün işlədilən sentrifuqaların istehsalını və sınaqlarını dayandırsın. Bunun cavabında Tehran bəyan etmişdir ki, uranın saflaşdırılması işinə istənilən vaxt başlaya bilər. İran parlamenti isə BAEA-nın həmin qətnaməsini qanunsuz sənəd adlandırmışdır.

İRAN DÜNYA BİRLİYİNİ ONUN URANI SAFLAŞDIRMAQ PROQRAMINI HƏYATA KEÇİRMƏK HÜQUQUNU TANIMAĞA ÇAĞIRIR

MÜƏLLİFLƏ ƏLAQƏ

Bölmənin digər xəbərləri