İRAN PREZİDENTİNİN AZƏRBAYCANA DOSTLUQ SƏFƏRİ
...Binə aeroportu Azərbaycan Respublikasının və İran İslam Respublikasının dövlət bayraqları ilə bəzədilmişdi. Dost ölkənin Prezidenti Əkbər Haşimi-Rəfsəncanini və onu müşayiət edən şəxsləri gətirən təyyarə yerə enir. Təyyarənin pilləkəni yanında ali qonağı Azərbaycan Respublikasının Prezidenti Heydər Əliyev qarşılayır. Milli geyimli oğlan və qızlar İran İslam Respublikasının Prezidentinə gül-çiçək dəstələri təqdim edirlər. Azərbaycanın və İranın dövlət himnləri səslənir. Fəxri qarovulun rəisi İran İslam Respublikasının Prezidentinə raport verir. Hər iki Prezident fəxri qarovulun önündən keçir və əsgərləri salamlayır.
Ali qonağı və onu müşayiət edən şəxsləri - İranın xarici işlər naziri Əli Əkbər Vilayətini, digər nazirləri və yüksək vəzifəli xadimləri Azərbaycan Respublikası Ali Soveti sədrinin müavini Afiyəddin Cəlilov, dövlət müşaviri Vəfa Quluzadə, Baş nazirin birinci müavini Vahid Əhmədov, Baş nazirin müavinləri Rəsul Quliyev, Abbas Abbasov, Səməd Sadıqov, Elçin Əfəndiyev, Əsgər Məmmədov, xarici işlər naziri Həsən Həsənov, nazirlər, xalq deputatları və başqaları qarşıladılar.
Heydər Əliyev və Əkbər Haşimi-Rəfsəncani kütləvi informasiya vasitələrinin nümayəndələri üçün bəyanat verdilər.
Heydər Əliyev dedi:
- İran İslam Respublikasının Prezidentinə və onu müşayiət edən şəxslərə rəsmi dəvətimi qəbul edib ölkəmizə gəldiklərinə görə öz minnətdarlığımı bildirirəm. Əminəm ki, nümayəndə heyəti Bakıda olduğu müddətdə xoş görüşlərin iştirakçısı olacaqdır. İnanıram ki, siyasi, iqtisadi, diplomatik, ticarət, gömrük və digər sahələr üzrə nəzərdə tutulan danışıqlar və imzalanacaq sənədlər Azərbaycanla İran İslam Respublikası arasında dostluq əlaqələrinin daha da möhkəmlənməsində mühüm rol oynayacaqdır. Bizim xalqlarımızı qədim tarixi olan dostluq və qardaşlıq münasibətləri bir-birinə sıx bağlayır. Azərbaycan müstəqillik əldə etdikdən sonra dövlətlərimiz arasında ikitərəfli əlaqələrin möhkəmlənməsi üçün hər cür şərait yaranmışdır. Əminəm ki, hər iki ölkənin mənafeyinə xidmət edən bu əlaqələr bundan sonra daha da genişlənib öz bəhrəsini verəcəkdir.
Sonra Əkbər Haşimi-Rəfsəncani mikrofona yaxınlaşaraq dedi:
- Heydər Əliyev xalq tərəfindən Prezident seçildikdən sonra Azərbaycan torpağına qədəm basdığım üçün özümü xoşbəxt sayıram. İnanıram ki, dövlətlərimiz arasında, iqtisadi və siyasi əlaqələr bundan sonra daha da inkişaf edəcəkdir. Hər iki dövlət arasında qarşılıqlı əlaqələr yaradılması və onların bir-birinə yaxınlaşması üçün hər cür şərait vardır. Ümidvaram ki, hər iki xalq bir-birinə əl uzadaraq ölkələrimizin inkişafı üçün də birgə səy göstərəcəkdir. Azərbaycan çətin şəraitdə yaşayır, onun torpağında ədalətsiz müharibə gedir. Əminəm ki, bu müharibə tezliklə sizin qələbənizlə başa çatacaq və torpağınızda sülh, əmin-amanlıq bərpa olunacaqdır.
Təyyarə meydanında rəsmi mərasim başa çatdıqdan sonra maşınlar karvanı motosikletçilərin müşayiəti ilə şəhərə, ali qonaq üçün ayrılmış iqamətgaha yol düşdü. Yol boyu on minlərlə bakılı hörmətli qonağı hərarətlə salamladı.
“Biz təcavüzkarın tezliklə öz cəzasına çatacağına, ərazi bütövlüyünüz və müstəqilliyiniz yolunda verdiyiniz şəhidlərin ruhunun sakit uyuyacağına, qaçqınların yaxın vaxtlarda öz evlərinə dönəcəklərinə inanırıq. Allahdan istəyimiz də ancaq budur. Tanrı öz bəndələrini imtahana çəkir, lakin heç vaxt onları darda qoymur”. İran Prezidenti Əkbər Haşimi-Rəfsəncaninin dünən Təzəpir məscidində şam və xətm namazından sonra Azərbaycan möminləri qarşısında dediyi bu sözlər məscidə toplaşanların “Amin” sədaları ilə qarşılanmışdır.
Dost ölkənin Prezidenti demişdir ki, Azərbaycan xalqının başına gələn bəlalar İran xalqına özünün çəkdiyi ağrılar kimi tanışdır. Çünki cəmi bir neçə il əvvəl onun ölkəsi də bu fəlakətlərə düçar olmuşdur. Ağayi Rəfsəncani əlavə etmişdir ki, İran xalqının inamı, qanı, canı bahasına və ulu yaradanın köməyi ilə biz təhlükədən sovuşduq. İndi isə həmin faciələr Azərbaycanın başına gətirilir. Sizə qarşı törədilən təcavüzə qeyrətli müsəlman övladlarının, Azərbaycan oğullarının rəşadəti nəticəsində son qoyulacağına ümid edirik.
Bakıya ikinci dəfə, müstəqil Azərbaycan Respublikasına isə ilk rəsmi səfərə gəldiyini söyləyən İran dövlətinin rəhbəri qeyd etmişdir ki, o, sovet rejimi dövründən sonra Azərbaycanda dinə inam və ehtiramın necə artdığının şahididir. Bunun özü Azərbaycan xalqının doğru yolda olduğuna bir nişanədir.
Qonaqları dindarlar adından salamlayan Qafqaz Müsəlmanları İdarəsinin sədri şeyxülislam hacı Allahşükür Paşazadə dost ölkənin yüksək səviyyəli nümayəndə heyətinin respublikamıza səfərinə böyük ümidlə yanaşdığını və İranın Azərbaycana qayğısını yüksək qiymətləndirdiyini bildirmişdir. O demişdir: “Qaçqınlarımıza köməyiniz və haqq işimizdə bizə mənəvi dayaq olmağınız bir-birinə qırılmaz tellərlə bağlı olan xalqlarımızın birliyinin və Allaha inamının əyani təcəssümüdür”.
İran Prezidenti ilə birlikdə Təzəpir məscidində Azərbaycanın xarici işlər naziri Həsən Həsənov, dövlət müşaviri Hidayət Orucov və digər rəsmi şəxslər olmuşlar.
Bölmənin digər xəbərləri
