İranın nüvə proqramına dair danışıqların davam etdirilməsi növbəti mərhələyə keçirilə bilər
Tehran, 23 noyabr (AZƏRTAC). İranın nüvə proqramı ilə bağlı Tehran rəsmiləri ilə “5+1” qrupu arasında noyabrın 21-də Cenevrədə başlanmış danışıqların 3-cü turu davam edir.
Bəzi yerli informasiya orqanlarının yaydığı məlumata görə, danışıqların davamı növbəti mərhələyə keçirilə bilər.
İran nümayəndə heyətinin üzvü, xarici işlər nazirinin müavini Seyid Abbas Ərəqçi KİV-ə bildirmişdir ki, rəsmi Tehran heç bir halda “uranın 20 faizədək zənginləşdirilməsindən imtina etmək” ifadəsini qəbul etməyəcəkdir. Onun sözlərinə görə, noyabrın 24-də İranın xarici işlər naziri Məhəmməd Cavad Zərifinin Avropa İttifaqının xarici siyasət və təhlükəsizlik məsələləri üzrə ali komissarı, İranla “5+1” qrupu arasında əlaqələndirici xanım Ketrin Eştonla görüşü nəzərdə tutulmuşdur.
Mövzu ilə bağlı bəzi məlumatlarda bildirilir ki, danışıqlar müsbət nəticə verəcəyi təqdirdə “5+1” qrupunda təmsil olunan dövlətlərin baş nazirləri Cenevrədə toplaşa bilərlər.
Sabir Şahtaxtı,
AZƏRTAC-ın xüsusi müxbiri
Tehran
Bölmənin digər xəbərləri
