İraqda iğtişaşlar nəticəsində həlak olanların sayı 40 nəfəri ötüb
Bakı, 4 oktyabr, AZƏRTAC
İraqda bir neçə gündür davam edən iğtişaşlar nəticəsində azı 44 nəfər həlak olub, yüzlərlə insan isə yaralanıb.
AZƏRTAC Reuters agentliyinə istinadla xəbər verir ki, bu barədə ölkənin hüquq-mühafizə orqanlarında və tibb xidmətlərində olan mənbələr məlumat yayıb.
Hazırda Bağdadda, həmçinin Ən-Nəsiriyə, Əl-Hillə və Əl-Əmra şəhərlərində komendant saatı tətbiq olunub.
Xatırladaq ki, oktyabrın 1-də İraqda həyat şəraitinin yaxşılaşdırılması, səhiyyə, təhsil sahələrində, əmək bazarında, həmçinin korrupsiya ilə mübarizədə problemlərin həlli tələbi ilə etiraz aksiyaları başlayıb. Etirazçılar Baş Nazir Adil Əbd əl-Mehdinin istefasını tələb edirlər. Paytaxtda və bəzi əyalətlərdə keçirilən dinc etiraz aksiyaları sonradan iğtişaşlara çevrilib.
Bu gün səhər televiziyada xalqa müraciətlə çıxış edən Baş Nazir aztəminatlı ailələrə müavinət ödənilməsi barədə qanunun qəbuluna cəhd göstərəcəyini bildirib, həmçinin həbs olunan etirazçıların azadlığa buraxılması ilə məşğul olacaq komissiyanın yaradıldığını elan edib.
Bölmənin digər xəbərləri
