İsveç dövləti Kosta işi ilə bağlı həkimlərə təzminat ödəyəcək
Stokholm, 16 iyun, AZƏRTAC
İsveç hökuməti uzun illər “Katrina da Kosta işi” kimi tanınan məhkəmə prosesində adı hallanan iki həkimin hər birinə 2 milyon kron (təxminən 213 min ABŞ dolları) məbləğində təzminat ödəmək barədə qərar qəbul edib.
AZƏRTAC xəbər verir ki, İsveçin ədliyyə naziri Qunnar Strömmerin sözlərinə görə, “ex gratia” qaydasında həyata keçiriləcək bu ödəniş dövlət qurumlarının fəaliyyəti nəticəsində həmin şəxslərin ciddi əziyyətlərə məruz qaldığının etirafıdır.
“Əgər səhvə yol verilibsə, dövlət bunu etiraf etməlidir. Bu məbləği onların çəkdiyi əzabların tam kompensasiyası hesab etmək olmaz. Bu, daha çox simvolik bir addım və onlara münasibətdə yolverilməz səhvlər olduğunun etirafıdır”, – deyə Q.Strömmer qeyd edib.
Söhbət məhkəmə patoloqu Teete Hyarme və həkim Tomas Algenedən gedir. Onlar 1988-ci ildə Katrina da Kostanın qətli ilə bağlı irəli sürülmüş ittiham üzrə bəraət alsalar da, məhkəmə hökmünün əsaslandırıcı hissəsində məhz onların mərhumun cəsədini hissələrə ayırdığı göstərilmişdi. Təqsirləndirilən şəxslər bəraət aldıqları üçün həmin ifadədən apellyasiya şikayəti vermək hüququna malik deyildilər. Sonradan hər iki şəxs tibbi fəaliyyət lisenziyasından məhrum edilib və onların vəkilləri bildirirlər ki, bu ittihamlar faktiki olaraq həyatlarını məhv edib.
İş 2024-cü ildə SVT telekanalının “İsveçdə cəsədin hissələrə ayrılması işi” adlı sənədli filminin yayımlanmasından sonra yenidən ictimaiyyətin diqqətini cəlb edib. Filmin müəllifləri məhkəmənin gəldiyi nəticələri şübhə altına alaraq onların yanlış məlumatlara əsaslandığını bildiriblər. İşə yenidən baxılması ilə bağlı bir neçə uğursuz cəhddən sonra həkimlərin vəkilləri bu ilin may ayında “ex gratia” qaydasında təzminat ödənilməsi barədə vəsatət qaldırıblar.
Hər iki şəxs 2007-ci ildə TT agentliyinə verdikləri müsahibədə məhkəmə prosesindən sonrakı həyatlarından danışaraq belə deyiblər: “Heç kim bizimlə iş görmək istəmir. Hətta tualet təmizləyicisi və ya xidmət heyəti kimi işə düzəlmək istəsəydik belə, bizi qəbul etməzdilər. Bu, əlbəttə ki, başadüşüləndir! Kim iki “cəsəd doğrayan”la yanaşı işləmək istəyər?”
Qeyd edək ki, Katrina da Kosta işi müasir İsveç tarixinin ən məşhur və mübahisəli cinayət işlərindən biri olaraq qalır. 1984-cü ildə qadının hissələrə ayrılmış cəsədi Stokholm ətrafında bir neçə müxtəlif yerdə aşkar edilmişdi. Onilliklər boyu aparılan istintaqa baxmayaraq, qətlin üstü hələ də açılmayıb və təqsirkar şəxslər rəsmən müəyyən edilməyib.
Bölmənin digər xəbərləri
