İraqda yenə də kütləvi etiraz aksiyaları başlayıb
Tehran, 12 may, AZƏRTAC
İraq parlamenti Mustafa Əl-Kaziminin namizədliyini Baş Nazir vəzifəsinə təsdiq etdikdən sonra Bağdad daxil olmaqla bir sıra böyük şəhərlərdə yenidən kütləvi etiraz aksiyaları başlayıb.
AZƏRTAC İraq mətbuatına istinadla xəbər verir ki, əhali yeni Baş Nazirdən korrupsiyaya uğramış məmurların cəzalandırılmasını və ölkənin sosial vəziyyətinin yaxşılaşdırılmasını tələb edib. Polis etirazçıların hökumət binalarının qarşısına yürüşünün qarşısını alsa da zor tətbiq etməyib.
Qeyd edək ki, cari ilin fevral və mart aylarında İraqda zorakılıqla müşahidə olunan kütləvi aksiyalar keçirilib. Əhali hökumətdən, ilk növbədə, ABŞ-ın hərbi hissələrinin ölkədən çıxarılmasını və sosial vəziyyətin yaxşılaşmasını tələb edirdi. Həmin dövrdə polislə qarşıdurmada 100-dən çox insan həlak olmuş, 500-dən çox aksiya iştirakçısı isə həbs edilmişdi.
Yeni Baş Nazir Mustafa Əl-Kazimi fevral və mart aylarında da həbs edilənlərin azadlığa buraxılması haqqında sərəncam imzalayıb və sosial vəziyyətin yaxşılaşacağı haqqında söz verib.
ABŞ Prezidenti Donald Tramp yeni Baş Nazirə zəng vuraraq vəziyyəti müzakirə edib.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
