İspandilli nəşrlər Azərbaycanın İtaliyaya qaz tədarükünü ikiqat artırmaq niyyətindən yazır
Madrid, 29 aprel, AZƏRTAC
İspaniyanın EFE xəbər agentliyi, İsveçrə İctimai Yayım Korporasiyasının beynəlxalq onlayn platformasının ispandilli versiyası - swissinfo.ch “Azərbaycan İtaliyaya qaz tədarükünü ikiqat artıra biləcəyini deyir” sərlövhəli məqalə dərc edib.
AZƏRTAC xəbər verir ki, məqalədə “Cənubi Qafqaz: inkişaf və əməkdaşlıq” mövzusunda beynəlxalq konfransın iştirakçıları ilə görüşdə Azərbaycan Prezidenti İlham Əliyevin ölkəmizin İtaliyaya qaz tədarükünü iki dəfə artıra biləcəyini və bunun üçün Trans-Adriatik Qaz Boru Kəmərinin (TAP) gücünün artırılmasının tələb olunduğunu vurğulayıb.
Azərbaycan dövlət başçısının sözlərinə görə, əlavə kompressor stansiyalarının quraşdırılması ilə TAP-ın ötürücülük qabiliyyətini ildə 20 milyard kubmetrə çatdırmaq olar. İspandilli nəşrlər yazır ki, TAP-ın gücünün artırılması İtaliyaya təbii qaz tədarükünü ikiqat artıra biləcək, Prezident İlham Əliyev bu məsələni artıq İtaliyanın baş naziri Mario Draqi və xarici işlər naziri Luici Di Mayo ilə müzakirə edib.
EFE qeyd edir ki, Bakının bu sahədə yeganə məqsədi Avropa bazarına bənzər sabit və tənzimlənən bazara çıxış əldə etməkdir.
Nigar Cəfərli
AZƏRTAC-ın xüsusi müxbiri
Madrid
Bölmənin digər xəbərləri
