İSRAİL MÜĞƏNNİSİNİN BAKIDA KONSERTİ
Aprelin 24-də Şəhriyar adına mədəniyyət mərkəzində İsrail estrada müğənnisi Aviva Avidanın konserti olmuşdur.
Azərbaycandakı “Soxnut” Yəhudi Ağentliyinin təşkil etdiyi konsert İsrailin müstəqillik gününə həsr olunmuşdur.
Aviva Avidan Bakıda olduğu iki gün ərzində paytaxtımızın görməli yerləri ilə, milli mətbəximizlə tanış olmağa imkan tapmışdır. O, vətənindəki Yaffa şəhərini xatırladan qədim İçərişəhərdə olmuş, dənizkənarı milli parkda gəzintiyə çıxmışdır. Onun sözlərinə görə, Bakı bulvarı ona Hayfa bulvarını xatırlatmışdır. Bu, müğənninin Azərbaycan paytaxtına ilk səfəridir. O, mətbuat konfransında bildirmişdir ki, ölkəmizə yenidən, ailəsi ilə birlikdə gəlmək niyyətindədir. Xanım Avidanın babası əslən Azərbaycandan olub, gənc yaşlarında İsrailə köçmüşdür.
Müğənni konsertdə dünyanın müxtəlif dillərində, o cümlədən türk dilində mahnılar oxumuşdur. O, növbəti səfərində mütləq Azərbaycan mahnılarını da ifa edəcəyinə söz vermişdir.
Bölmənin digər xəbərləri
