İstanbulda şəhidlər yad ediliblər VİDEO
İstanbul, 27 sentyabr, AZƏRTAC
İstanbulda Türkiyə və Azərbaycan şəhidlərinə həsr edilən anım mərasimi təşkil olunub.
AZƏRTAC xəbər verir ki, 27 Sentyabr - Anım Günü ilə əlaqədar keçirilən tədbir Türkiyə-Azərbaycan Dərnəkləri Federasiyası tərəfindən təşkil edilib.
Türkiyənin və Azərbaycanın Dövlət himnlərinin səsləndirilməsi ilə başlayan tədbirdə iki qardaş ölkənin şəhidləri yad olunub.
Tədbirdə çıxış edən Milli Məclis sədrinin müavini Musa Qasımlı, Azərbaycan Diasporla İş üzrə Dövlət Komitəsinin sədrinin birinci müavini Valeh Hacıyev, ölkəmizin İstanbuldakı baş konsulu Zamin Əliyev, Türkiyə-Azərbaycan Dərnəkləri Federasiyasının sədri Ədalət Turan, Türkiyə Böyük Millət Məclisinin deputatl, Azərbaycan-Türkiyə parlamentlərarası Dostluq Qrupunun sədri Şamil Ayrım, Milli Məclisin deputatı Məşhur Məmmədov, İstanbulun Bağcılar rayonunun rəhbəri Abdullah Uçqun və Bağcılar Bələdiyyəsinin sədr müavini Ali Ərdoğan Qarabağ Zəfərinə gedən yoldan və bu tarixi Qələbədən bəhs ediblər.
Bildirilib ki, bu Qələbə dövlətimizin apardığı doğru siyasət, xalqımızın birliyi və şanlı Ordumuzun qəhrəmanlığı sayəsində əldə olunub. Əsgərlərimiz Vətən qarşısında borclarını şərəflə yerinə yetiriblər. Onlar şəhidliyi müqəddəs bir amal kimi qəbul edib, canlarını Vətən uğrunda fəda etməkdən çəkinməyiblər. Bu gün Azərbaycan qarşısına qoyduğu məqsədlərə nail olub. İkinci Qarabağ müharibəsi nəticəsində əldə olunan şanlı Zəfər yalnız Azərbaycan deyil, bütün Türk dünyası üçün böyük əhəmiyyət daşıyan tarixi hadisədir. Bu Qələbə digər türk dövlətlərinə də göstərdi ki, birlik, iradə, güclü dövlətçilik və milli həmrəylik böyük məqsədlərə çatmaq üçün mühüm amillərdir. Bu gün Azərbaycan tarixini, milli kimliyini və mənəvi dəyərlərini qoruyaraq gələcəyə daha inamla addımlayır.
Natiqlər Azərbaycan və Türkiyə arasındakı tarixi bağlara toxunaraq, bu birliyin əsrlərin sınağından keçərək daha da möhkəmləndiyini qeyd ediblər.
Tədbir çərçivəsində videoçarxlar da nümayiş etdirilib.
Tədbirin rəsmi hissəsindən sonra Azərbaycanın ərazi bütövlüyü və suverenliyi uğrunda canlarından keçən şəhidlərimizin əziz xatirəsinə ehtiram əlaməti olaraq ehsan süfrəsi açılıb.
Bölmənin digər xəbərləri
