İQTİSADİYYAT
İstifadə edilməmiş məzuniyyət üçün ödənilən kompensasiyadan vergi hansı qaydada tutulur?
![İstifadə edilməmiş məzuniyyət üçün ödənilən kompensasiyadan vergi hansı qaydada tutulur?](/files/2022/3/1200x630/1668420821599096397_1200x630.jpg)
Bakı, 14 noyabr, AZƏRTAC
Vergi Məcəlləsinə əsasən, 2019-cu il yanvarın 1-dən 7 il müddətində neft-qaz sahəsində fəaliyyəti olmayan və qeyri-dövlət sektoruna aid edilən vergiödəyicilərində işləyən fiziki şəxslərin muzdlu işdən aylıq gəlirləri 8 min manatadək olduqda, gəlir vergisi 0 faiz dərəcə ilə, 8 min manatdan çox olduqda 8 min manatdan çox olan məbləğin 14 faizi həcmində tutulur.
AZƏRTAC Dövlət Vergi Xidmətinə istinadla xəbər verir ki, buna əsasən əvvəlki illərdə istifadə olunmamış məzuniyyətə görə kompensasiya ödənilərkən tam iş illərinin kompensasiya haqları ayrı-ayrılıqda, o cümlədən cari iş ilinə görə istifadə olunmamış məzuniyyətə görə ödənilən kompensasiya haqqı ödəniş aparılan ayın əməkhaqqına əlavə edilmədən ayrılıqda fiziki şəxslərin gəlir vergisinə cəlb edilir.
Eyni zamanda, əvvəlki illərdə istifadə olunmamış məzuniyyətə görə hər il üzrə ayrılıqda hesablanmış kompensasiya haqları 2020-ci ildə ödənildiyi halda gəlir vergisi və sosial sığorta haqları 2019-cu il yanvarın 1-dən qüvvədə olan dərəcələrlə hesablanır.