SİYASƏT
İstirahət günü olmasına və soyuq havaya baxmayaraq, seçicilər axınının ardı-arası kəsilmir
Bakı, 1 noyabr, Rafael Həsənov, AZƏRTAC
Xəbər verdiyimiz kimi, 22 saylı Nəsimi İkinci seçki dairəsində seçkilərin gedişini 510 yerli müşahidəçi izləyir. Onlardan biri Bakının Binəqədi rayonundakı 3 nömrəli məktəbin müəllimi Mahizər Şirinovadır.
Müşahidəçilər qrupuna öz təşəbbüsü ilə qoşulmuş Mahizər müəllimə AZƏRTAC-a müsahibəsində bildirib ki, istirahət günü və havanın soyuq olmasına baxmayaraq, seçicilər axınının ardı-arası kəsilmir. Onun sözlərinə görə, səsvermə prosesində qanunvericiliyin tələblərinin pozulması halları olmayıb, bunu əcnəbi müşahidəçilər də təsdiq edir.
M.Şirinova qeyd edib ki, o, əvvəllər də seçkilərdə müşahidəçi olub və onun fikrincə, bugünkü seçkilərdə seçicilərin fəallığı daha yüksəkdir. O, bir arzusunu da bildirib ki, bu seçkilərdə qalib gələn namizədlər Milli Məclisin deputatları kimi fəaliyyətlərində bugünkü soyuq havada öz işlərini bir kənara qoyub onlara səs verməyə gəlmiş seçicilərin maraqları naminə çalışsınlar.