İDMAN
İsveçrə ilə oyundan öncə Azərbaycan millisinin basketbolçuları ilə görüş keçirilib
Bakı, 23 noyabr, AZƏRTAC
Azərbaycan Basketbol Federasiyasının (ABF) rəhbərliyi kişi basketbolçulardan ibarət Azərbaycan millisinin oyunçu və məşqçi heyəti ilə görüşüb.
ABF-dən AZƏRTAC-a verilən məlumata görə, görüş zamanı dünya çempionatının seçmə mərhələsində İsveçrə ilə baş tutacaq vacib oyundan öncə yığmanın üzvlərinə həm mənəvi dəstək, həm də qələbə əzmini artıracaq motivasiya mesajları çatdırılıb.
Federasiyanın prezidenti Emin Əmrullayev milli komandanın yeni uğurlar qazanmaq potensialına malik olduğunu vurğulayaraq, basketbolçuların ölkəmizi layiqincə təmsil etmək üçün göstərdiyi səyləri yüksək qiymətləndirib. Görüşün sonunda yığmaya İsveçrə ilə oyunda uğurlar arzulanıb.
Qeyd edək ki, noyabrın 24-də Bakıda keçiriləcək Azərbaycan - İsveçrə oyunu saat 14:00-da start götürəcək.
