İtaliya hökuməti Presiççedə ev alanlara 30 min avro ödəyəcək
Roma, 20 noyabr, AZƏRTAC
İtaliyanın Puqlia əyalətinin cənubunda yerləşən Presiççe qəsəbəsində əhali sayının azalması ilə mübarizə aparmaq üçün yeni kampaniya başladılıb. Belə ki, qəsəbədəki tərk edilmiş evləri almağa razı olanlara 30 min avro ödənəcək.
AZƏRTAC xəbər verir ki, qəsəbədəki evlərin çoxu uzun müddətdir sahibləri tərəfindən tərk edilib. Şəhərin tarixi mərkəzində isə 1991-ci ildən əvvəl tikilmiş çox sayda boş ev var. Tərk edilmiş evlərə köçmək istəyənlərə ödənəcək 30 min avronun bir hissəsi evi almağa, qalanı isə təmir üçün nəzərdə tutulub. Hazırda qəsəbədə evlərin orta qiyməti 25 min avrodur.
Yaxın həftələrdə kampaniya ilə bağlı müraciətlərin qəbul ediləcəyi bildirilib.
Qeyd edək ki, İtaliyanın bir çox şəhərinin rəhbərliyi yaşlı əhalinin sayının azalması, doğum səviyyəsinin aşağı olması və gənclərin böyük şəhərlərə üz tutması səbəbindən əhali sayındakı itki ilə mübarizə aparmaq üçün müxtəlif kampaniyalarla insanları həmin ərazilərdə məskunlaşmağa cəlb etməyə çalışır.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
