İyul ayında 58 şəhər və rayonun əhalisinə 1 milyondan çox tibbi xidmət göstərilib
Bakı, 18 avqust, AZƏRTAC
İcbari tibbi sığortanın tətbiq olunduğu tibb müəssisələri tərəfindən İcbari Tibbi Sığorta üzrə Dövlət Agentliyinə təqdim edilən ilkin hesabatlara əsasən, 2021-ci ilin iyulunda 58 şəhər və rayonda 329 min 754 vətəndaşa 1 milyon 184 min 204 tibbi xidmət göstərilib.
Agentliyin Marketinq və ictimaiyyətlə əlaqələr departamentindən AZƏRTAC-a verilən məlumata görə, bu müddətdə tibb müəssisələri, onların struktur bölmələri və müalicə diaqnostika mərkəzlərinə 537 min 1 müraciət daxil olub. Müraciətlər üzrə göstərilən tibbi xidmətlərin 1 milyon 18 min 178-i ambulator, 166 min 26-sı isə stasionar şəraitdə göstərilib.
İyul ayı üzrə həmin regionlara dair əhaliyə göstərilən tibbi xidmətləri əks etdirən bir neçə statistik göstərici təqdim edilir:
-Əhalinin hər 1000 nəfərinə tibb müəssisələrinə olunan müraciət sayına əsasən, ilk onluqda yer alan şəhər və rayonlar: Mingəçevir (386) və Şirvan (177) şəhərləri, Ağdaş (171), Yevlax (160), Qəbələ (155), Beyləqan (155), Qax (153), Göygöl (148) rayonları, Gəncə şəhəri (146), Ağstafa (144) rayonu.
-Ən çox xidmət göstərmiş tibb müəssisələrinin ilk onluğu: Mingəçevir Şəhər Mərkəzi Xəstəxanası (124 min 853), Gəncə Birləşmiş Şəhər Xəstəxanası (98 min 656), Xaçmaz (60 min 213), Yevlax (55 min 651), Ağdaş (36 min 401), Şəki (36 min 386), Quba (35 min 306), Bərdə (32 min 474), Göyçay (32 min 355) və Zaqatala (30 min 674) rayon mərkəzi xəstəxanaları.
- Ən çox ambulator xidmət göstərmiş tibb müəssisələrinin ilk onluğu: Mingəçevir Şəhər Mərkəzi Xəstəxanası, Gəncə Birləşmiş Şəhər Xəstəxanası, Xaçmaz, Yevlax, Ağdaş, Şəki, Quba, Bərdə, Göyçay və Zaqatala rayon mərkəzi xəstəxanaları.
- Ən çox stasionar xidmət göstərmiş tibb müəssisələrinin ilk onluğu: Gəncə Birləşmiş Şəhər Xəstəxanası, Mingəçevir Şəhər Mərkəzi Xəstəxanası, Xaçmaz, Qusar, Yevlax, Şəki, Ağdaş, Quba rayon mərkəzi xəstəxanaları, Şirvan Şəhər Mərkəzi Xəstəxanası, Göyçay Rayon Mərkəzi Xəstəxanası.
58 rayon və şəhər üzrə tibb müəssisələrinə müraciətlərin çoxu əhalinin sağlamlıq vəziyyətinə təsir edən amillər, qan dövranı sistemi, endokrin sistemi xəstəlikləri, maddələr mübadiləsi və qidalanma pozğunluğu, sidik-cinsiyyət, həzm, tənəffüs, sümük və əzələ sisteminin və birləşdirici toxumanın xəstəlikləri, mamalıq və ginekologiya, zədələr və zəhərlənmələr, habelə, gözün və gözün əlavə aparatının xəstəlikləri ilə bağlı olub.
İyulda 11 tibbi ərazi bölməsi (TƏB) üzrə göstərilmiş tibbi xidmət sayına görə ardıcıllıq aşağıdakı kimidir:
Bərdə-Yevlax TƏB (264 min 266), Şəki-Zaqatala TƏB (164 min 698), Quba-Xaçmaz TƏB (164 min 83), Gəncə TƏB (152 min 570), Şəmkir-Tovuz TƏB (88 min 34), Göyçay-Kürdəmir TƏB (76 min 820), Dağlıq Şirvan TƏB (73 min 871), Ağdam-Ağcabədi TƏB (68 min 962), İmişli-Sabirabad TƏB (54 min 678), Lənkəran TƏB (42 min 322) və Cəlilabad-Salyan TƏB (33 min 900).
2020-ci il yanvarın 1-nə olan rəsmi məlumata əsasən, icbari tibbi sığortanın tətbiq edildiyi 58 inzibati ərazi vahidləri üzrə qeydiyyatda olan əhalinin sayı 6 milyon 560 min 500 nəfər təşkil edir.
Məlumata əsasən, bütün ölkə üzrə iyulda 522 min 605 nəfərə 849 min 104 müraciət üzrə 1 milyon 807 min 764 tibbi xidmət göstərilib. Müraciətlər üzrə göstərilən tibbi xidmətlərin 1 milyon 478 min 769-u ambulator, 328 min 995-i isə stasionar şəraitdə göstərilib.
Cari ilin yanvar-iyul ayları ərzində isə 2 milyon 393 min 1 nəfər tibb müəssisələrinə müraciət edib və bu dövr ərzində onlara 11 milyon 42 min 291 tibbi xidmət göstərilib. Bu xidmətlərdən 9 milyon 54 min 679-u (82 faiz) 18 yaşdan yuxarı, 1 milyon 987 min 612-si (18 faiz) isə 18 yaşdan aşağı olanlara göstərilib.
Bölmənin digər xəbərləri
