Kabil aeroportundakı ABŞ hərbçilərinin sayı 4,5 min nəfərə çatıb
Bakı, 18 avqust, AZƏRTAC
Kabil aeroportunda hazırda 4,5 minə yaxın ABŞ hərbçisi var.
AZƏRTAC xəbər verir ki, bu barədə Reuters agentliyi Birləşmiş Ştatlar hakimiyyətinin nümayəndəsinə istinadla məlumat yayıb. Onun məlumatına görə, yaxın bir neçə gündə bu rəqəm 6 min nəfərə çatacaq. Əfqanıstan paytaxtından təxliyə əməliyyatları zamanı logistika məsələlərinə cavabdeh olan general Henk Teylor dünən Pentaqonda keçirilən brifinqdə bildirmişdi ki, avqustun 17-də günün sonunadək Əfqanıstanda ABŞ hərbi kontingenti 4 mini ötməlidir. Dövlət Departamenti və Pentaqonun bazar günü yayılan bəyanatında deyilirdi ki, Əfqanıstanda ABŞ hərbi qulluqçularının sayı 48 saat ərzində 6 min nəfərədək genişləndiriləcək. Onların yeganə məqsədi amerikalıların və onlara kömək etmiş əfqanların ölkədən çıxarılmasıdır.
Avqustun 15-də paytaxt Kabilə döyüşsüz daxil olan “Taliban” hərəkatının silahlı dəstələri şəhəri qısa müddətdə nəzarətə götürüb. Prezident Əşrəf Qani qan tökülməsinin qarşısını almaq üçün istefa verərək ölkəni tərk edib. Qərb ölkələri öz vətəndaşlarını və səfirlik əməkdaşlarını Əfqanıstandan təcili təxliyə edir.
Bölmənin digər xəbərləri
