Kaliforniya Universitetinin tələbələrinə Azərbaycan reallıqları barədə məlumat verilib
Vaşinqton, 17 mart, AZƏRTAC
Azərbaycanın Los-Ancelesdəki baş konsulu Nəsimi Ağayev ABŞ-ın Kaliforniya Nortridc Ştat Universitetində ölkəmizlə bağlı mühazirə ilə çıxış edib. Universitetin dəvəti ilə reallaşan tədbirdə 120-dən çox tələbə iştirak edib.
N.Ağayev çıxışında Azərbaycanın zəngin mədəni irsi, keçdiyi tarixi inkişaf yolu və yerləşdiyi coğrafi məkan, eləcə də Azərbaycanın multikultiralizmin mərkəzlərindən biri olması və ölkəmizin qədim tolerantlıq ənənələri barədə danışıb. Diplomat Azərbaycan torpaqlarının Ermənistan silahlı qüvvələri tərəfindən işğalı, həmin torpaqlarda ermənilərin mülki azərbaycanlı əhaliyə qarşı törətdikləri hərbi cinayətlər, xüsusilə Xocalı soyqırımı barədə danışıb. Baş konsul qeyd edib ki, münaqişənin həlli ilə bağlı Ermənistan rəhbərliyinin yürütdüyü qeyri-konstruktiv siyasət, ilk növbədə, Ermənistanın və bu ölkənin xalqının özünün gələcəyinə zərbə vurur. Təsadüfi deyil ki, məhz bu siyasət nəticəsində Ermənistan son 24 ildə əhalisinin az qala yarısını itirib, böyük iqtisadi problemlərlə üzləşib və xarici yardımlardan asılı vəziyyətə düşüb. N.Ağayev münaqişənin həllinin yalnız Ermənistan silahlı qüvvələrinin işğal olunmuş Azərbaycan ərazilərindən çıxarılmasından və azərbaycanlı məcburi köçkünlərin öz doğma torpaqlarına qayıtmasından sonra mümkün olacağını qeyd edib.
Diplomat Azərbaycan xalqının ümummilli lideri Heydər Əliyevin yorulmaz səyləri nəticəsində ölkəmizin ötən əsrin 90-cı illərdə bir sıra təhlükələrdən xilas olaraq, inkişaf və yüksəliş yoluna qədəm qoyduğunu bildirib. Ötən dövrdə Prezident İlham Əliyevin rəhbərliyi altında əldə olunan mühüm nailiyyətləri qeyd edən baş konsul bu gün Azərbaycanın regionda siyasi və iqtisadi güc mərkəzinə çevrildiyini söyləyib. O, Azərbaycanın yürütdüyü konstruktiv xarici siyasət barədə danışaraq, ölkəmizin ABŞ, region dövlətləri və ümumilikdə beynəlxalq birliklə münasibətləri haqqında iştirakçılara məlumat verib.
Tədbirin sual-cavab qismində baş konsul tələbələrin suallarını cavablandırıb.
Yusif Babanlı
AZƏRTAC-ın xüsusi müxbiri
Vaşinqton
Bölmənin digər xəbərləri
