Kapitanın sonuncu mesajı: Qəhrəman olmağa gedirik...
Bakı, 3 noyabr, AZƏRTAC
“Hamınızı çox sevirəm. Özünüzdən muğayat olun. Qəhrəman olmağa gedirik. Allah sizə cansağlığı versin. Zəng etməyin. Qəlbimdəsiniz...”
Bu, oktyabrın 1-i saat 01:18-də kapitan Vüqar Nəcəfovun ailəsinə göndərdiyi sonuncu mesajdır. Özü də şəhadətindən cəmi bir gün əvvəl...
O, oktyabrın 2-də Cəbrayıl rayonunun Nüzgar kəndində “Ohanyan səddi”nin yarılması zamanı şiddətli döyüşlərdə tabeliyindəki şəxsi heyəti xilas edərək şəhid olub.
AZƏRTAC Vətən müharibəsi şəhidi, Azərbaycan Ordusunun zabiti, kapitan Vüqar Nəcəfovun ailə üzvləri ilə həmsöhbət olub.
Şəhidin bacısı Günel Abdullayeva qardaşı ilə bağlı xatirələrini bölüşüb: “Evin sonbeşiyi, iki bacının yeganə qardaşı olan Vüqar çox gözəl xarakterli, mehriban, qayğıkeş idi. Uşaqla uşaq, böyüklə böyük kimi davranardı. Bir dəfə də olsun xətrimizə dəyəcək kəlmə işlətməyib. Söhbətcil insan idi, səlis danışıq qabiliyyəti adama zövq verirdi. O, təkcə ailə üzvlərinə qarşı diqqətcil deyildi, ətrafına, iş yoldaşlarına, silahdaşlarına da can yandırırdı. Əsgərləri, iş yoldaşları Vüqara bir zabit kimi hörmət edir, bir insan kimi onu çox istəyirdilər.
Uşaq yaşlarından həddən ziyadə vətənpərvər idi. Vətənə xidmət arzusunun ardınca gedən Vüqar bu yolda ilk addımı 2006-cı ildə Heydər Əliyev adına Hərbi İnstituta daxil olmaqla atdı. 2011-ci ildən isə ön xəttə xidmət edirdi. Onun ən böyük arzularından biri torpaqlarımızın azad edilməsi uğrunda döyüşmək idi. Hər zaman əminliklə deyirdi ki, biz çox güclüyük, torpaqlarımızı çox asanlıqla azad edəcəyik. Onun dediyi kimi də oldu. Otuz ilə yaxın işğalda qalan torpaqlar cəmi 44 günə azad edildi... Elə Vüqar kimi cəsur döyüşçülərin sayəsində...
Vüqar Vətən müharibəsinə qədər 2016-cı il Aprel döyüşlərində iştirak etmişdi. Vətən müharibəsi başlayanda isə onun bir zabit kimi kifayət qədər təcrübəsi var idi. 2020-ci il sentyabrın 20-də Vətən müharibəsinə Bakı Həmlə Taborunun tərkibində yollandı. Füzuli, Xocavənd, Cəbrayıl istiqamətlərində aparılan hərbi əməliyyatlarda şücaəti ilə seçilənlər sırasında oldu. Oktyabrın 2-də isə Cəbrayıl rayonunun Nüzgar kəndində qızğın döyüşlərdə tabeliyindəki şəxsi heyətini xilas etsə də, özü şəhid oldu...
Vüqarı ən son Vətən müharibəsindən təxminən 40 gün əvvəl 2020-ci il avqustun 17-də görmüşdüm. Oğlumun doğum günü idi. Ailəsi ilə iki gün qonağım oldu. Doyunca və çox gözəl vaxt keçirə bildik.
Vətən müharibəsi başlayanda Vüqar sevincindən yerə-göyə sığmırdı. Ən son sentyabrın 30-da mənimlə əlaqə saxladı. Çox sevincli idi. Deyirdi ki, tezliklə şad xəbərlər alacaqsınız. Həyat yoldaşıma isə Şuşanı almaq bizə qismət olacaq demişdi. Qismət oldu, lakin təəssüf ki, Vüqar o günü görə bilmədi...
Oktyabrın 1-i gecə hamımıza bir mesaj göndərmişdi. Mesajdakı cümlələrdən biri xüsusilə diqqət çəkirdi: “Qəhrəman olmağa gedirik”. O mesajdakı dərin mənanı çox sonra başa düşdük. Çünki cəmi bir gün sonra o adını şanlı tarixin qəhrəmanları sırasına yazdırdı... Oktyabrın 1-i səhər saat 11-də valideynlərimizlə danışıb, “nigaran qalmayın yaxşıyam”, anamıza isə “Allah sənin köməyin olsun, ana” deyib. Sanki anamızı şəhid anası olacağı xəbərinə hazırlayırmış...
Özündən Vətənə yadigar qızı İnci, oğlu Aydını qoyub getdi. Biz də çalışırıq ki, övladları onun istədiyi kimi Vətənə, xalqa xeyirli, cəmiyyətə faydalı övladlar olsunlar. O zaman Vətənini canından çox sevən qardaşımın ruhu şad olacaq”.
Qeyd edək ki, şəhid kapitan Vüqar Nəcəfov Prezident İlham Əliyevin sərəncamları ilə “Füzulinin azad olunmasına görə”, “Xocavəndin azad olunmasına görə”, “Cəbrayılın azad olunmasına görə”, “Cəsur döyüşçü”, “Vətən uğrunda” medalları, 3-cü dərəcəli “Vətənə xidmətə görə” ordeni ilə təltif olunub.
Bölmənin digər xəbərləri
