Kataliz və Qeyri-üzvi Kimya İnstitutunda gənclərlə görüş olub
Bakı, 28 dekabr, AZƏRTAC
Kataliz və Qeyri-üzvi Kimya İnstitutunun baş direktoru akademik Dilqəm Tağıyevin gənclərlə görüşü keçirilib.
İnstitutdan AZƏRTAC-a bildirilib ki, görüşdə akademik Dilqəm Tağıyev müəssisədə 2024-cü ildə əldə olunan nailiyyətlərdən bəhs edib. Qeyd edib ki, bu il institutun göstəriciləri yüksək olub. İnstitut əməkdaşlarının 149 məqaləsindən 91-i xaricdə nəşr edilib. Məqalələrdən 127-si “Scopus” və “Web of Science” bazalarında indeksləşən jurnallarda dərc olunub.
İnstitutun rəhbəri qeyd edib ki, bundan başqa, 2024-cü ildə 10 monoqrafiya və dərslik çap olunub, 6 patent alınıb. Əməkdaşların çap etdirdiyi 167 tezisdən 87-i xaricdə işıq üzü görüb. Bu nailiyyətlərin əldə olunmasında gənc alimlərin də kifayət qədər rolu vardır: “Alınan nəticələrimiz yaxşı göstəricidir, məhz buna görədir ki, National H-indeksin 2024-cü ilin 4-cü rübünün nəticələrinə görə institut Azərbaycanda fəaliyyət göstərən 84 ali təhsil və elmi təşkilat arasında 10-cu yerdədir. Kimya bölməsi üzrə bizim institutun göstəriciləri digər kimya institutları ilə müqayisədə daha yüksəkdir”.
Akademik qeyd edib ki, 2024-cü ildə institutun gənc əməkdaşlarından bir çoxu xarici ölkələrdə konfranslarda, tədbirlərdə, təlimlərdə iştirak edib, sertifikat və diplomlara layiq görülüb. Onlar elmi-tədqiqat işlərinin bir hissəsini xaricdə tədqiqat institutlarında aparıb və alınmış nəticələri birgə məqalələr şəklində çap etdiriblər. O, institutun əməkdaşı Aysel Məmmədovanın təqaüd qazanaraq Macarıstanda 4 il doktorantura təhsili aldığını, bütün xərcləri Macarıstanın öz üzərinə götürdüyünü, bunun gənclərin inkişafı üçün sevindirici hal olduğunu qeyd edib.
Baş direktor çıxışında gəncləri lazımlı mütəxəssis olmağa, xarici dil biliklərini zənginləşdirməyə, xarici ölkələrlə beynəlxalq əməkdaşlığı daha da artırmağa, təqaüd proqramlarında, yerli və xarici ölkələrdə konfranslarda, simpoziumlarda, müsabiqələrdə daha fəal iştirak etməyə çağırıb.
Bölmənin digər xəbərləri
