Keçmiş SSRİ məkanında baş vermiş sarsıntıların əsas təqsirkarı Mixail Qorbaçovdur
Bakı, 26 avqust (AZƏRTAC). Avqustun 25-də “Exo Moskvı” radiostansiyasının axşam efirində “DFVK nə ilə başa çatdı” adlı veriliş səsləndi. Bu veriliş 1991-ci ilin avqust ayında keçmiş SSRİ-də baş vermiş məlum hadisələrin 20 illiyinə həsr edilmişdi. Əslində bütün dillərdə xalqlar arasında “QKÇP” adlanan Dövlət Fövqəladə Vəziyyət Komitəsinin (DFVK) yaradılması ilə nəticələnmiş 1991-ci ilin avqust qiyamı İttifaqın dağılmasına gətirib çıxarmış son addımlardan biri olmuşdur. Radiostansiyanın baş redaktoru Aleksey Venediktovun və aparıcı Nərgiz Əsədovanın suallarına SSRİ-nin birinci və sonuncu prezidenti Mixail Qorbaçov cavab verirdi.
Müsahibənin gedişində aydın oldu ki, Sovet İttifaqının birinci prezidenti ölkədə vəziyyəti yaxşı təsəvvür etmir, öz ətrafındakılara nəzarət edə bilmirdi. Bütün bunlar Azərbaycanda, Litvada, Gürcüstanda və digər respublikalarda faciəli hadisələrə gətirib çıxarmışdı. Qorbaçov özü verilişdə etiraf etmişdi ki, onun Sov.İKP MK-nın Baş katibi, sonra isə SSRİ-nin prezidenti olması təsadüf idi. Onun heç bir xüsusi xidmətləri olmamışdı, bu vəzifələrə seçilməsi yalnız o vaxt cavan olması sayəsində mümkün olmuşdu. Səriştəsizlik, abırsızlıq, özünə çox güvənmək, qərəzlilik, fərsiz rəhbərlik və bacarıqsız milli siyasət, prioritet vəzifələri müəyyən etməyi bacarmamaq nəticə etibarilə DFVK ilə bağlı avantüraya, onun biabırçı şəkildə iflasına, sonra isə çoxlu faciələr və insan tələfatı ilə müşayiət olunan Sovet İttifaqının dağılmasına gətirib çıxarmışdır.
Verilişin aparıcısı Nərgiz Əsədova qeyd etmişdir ki, DFVK-nın 20 illiyi ilə əlaqədar Rusiyada keçirilən müxtəlif sorğuların iştirakçıları Mixail Qorbaçovu SSRİ-nin dağılmasının və bunun ardınca baş vermiş sarsıntıların əsas təqsirkarı adlandırırlar. Azərbaycanda belə hesab edirlər ki, 1990-cı ilin Qanlı Yanvar hadisələrinə görə, Qorbaçov məsuliyyət daşıyır. O vaxt Sovet Ordusu hissələrinin Bakıya yeridilməsi nəticəsində heç bir təqsiri olmayan 170-dən çox insan öldürülmüş, yüzlərlə adam yaralanmış və şikəst olmuşdur.
Bölmənin digər xəbərləri
