KƏND MƏDƏNİYYƏT EVİNİN SƏHNƏSİNDƏYENİ ƏSƏR TAMAŞAYA QOYULMUŞDUR
Balakən rayonunun ən böyük yaşayış məntəqələrindən olan Katex kənd mədəniyyət evinin səhnəsində görkəmli dramaturq Mirzə Fətəli Axundovun “Hekayəti-Müsyö Jordan və dərviş Məstəli şah” əsəri tamaşaya qoyulmuşdur. Əhalisinin sayı 8 min nəfərə yaxın olan Katex kəndinin mədəniyyət müəssisələri işçilərinin birgə səyi ilə hazırlanan bu tamaşanın quruluşçu rejissoru kənd mədəniyyət evinin direktoru Nərgiz Hacıyevadır. Tamaşada əsas rolları Kərimət Müslümova, Həqiqət Məmmədova, Nərgiz Hacıyeva, Nazim Manafov, Zahid Məmmədov və başqaları ifa edirlər.
Rayon Mədəniyyət şöbəsindən AZƏRTAC-ın müxbirinə bildirmişlər ki, bu günlərdə rayon mədəniyyət evində tamaşaya ictimai baxış olmuşdur. Rayon ictimaiyyətinin, ziyalıların və teatrsevərlərin iştirak etdiyi ilk tamaşa böyük müvəffəqiyyətlə başa çatmışdır. Kollektiv bu tamaşa ilə rayonun kəndlərində də çıxış etməyi planlaşdırır.
Bölmənin digər xəbərləri
