“Kəpəz”in yeni transferi: Əminliklə deyə bilərəm ki, komandamız Premyer Liqada qalacaq – MÜSAHİBƏ
Bakı, 13 yanvar, AZƏRTAC
“Kəpəz” komandasının gürcüstanlı yeni transferi Rati Ardazişvili AZƏRTAC-ın suallarını cavablandırıb. Həmin müsahibəni təqdim edirik:
-“Kəpəz” komandasına keçidiniz necə baş tutdu?
-Klub məni ilk gündən heyətində görmək üçün böyük səy göstərdi. Təbii ki, bu, məni çox xoşbəxt etdi. Rəhbərliyə göstərdikləri etimada görə təşəkkür edirəm. Burada olmaqdan xoşbəxtəm.
-Ölkəmiz barədə təəssüratlarınız necədir?
-Daha əvvəl də azərbaycanlılarla ünsiyyət qurmuşam. Bilirdim ki, insanlarınız çox diqqətli və qonaqpərvərdilər. Bura gələndən sonra bundan daha da əmin oldum.
-Azərbaycanda çoxlu gürcü futbolçular çıxış edib. Hazırda da həmyerlilərinizə rast gəlmək olar. Onlardan ölkəmiz barədə məlumat almısınızmı?
-Açığı, Azərbaycan çempionatı ilə bağlı kifayət qədər informasiyam yox idi. Buna görə də bəzi futbolçulardan liqa barədə məlumat aldım. Onlar yalnız xoş sözlər dedilər.
-“Kəpəz” turniri cədvəlində 11 xalla 10 komanda arasında 9-cu pillədə qərarlaşıb. Bu, sizi narahat edirmi?
-Komandanın hansı mövqedə olmasının mənim üçün fərqi yoxdur. Uğur əldə edəcəyimizə inandığım üçün buradayam. Olduğumuz mövqe müvəqqətidir. Mən hər zaman qalib gəlməyə fokuslanıram. Oynadığım klubun birinci və ya doqquzuncu yerdə olması böyük əhəmiyyət kəsb etmir.
-Sizinlə 6 ay+ 1 illik müqavilə imzalanıb. Komanda elitada qalsa, böyük ehtimal, sözləşmə avtomatik olaraq uzadılacaq. Sizcə, “Kəpəz”i bu çətin vəziyyətdən çıxara biləcəksinizmi?
-Biz bir komandayıq və hər şeyi birlikdə etməliyik. Kollektivdə olan bütün futbolçular önəmlidir. Bacardığım qədər komandaya kömək edəcəyimə inanıram. Bütün fikrimi işimə yönəltmişəm.
-“Kəpəz”in Premyer Liqada qalacağına inanırsınız?
-Əlbəttə. Əminliklə deyə bilərəm ki, bu komanda Premyer Liqada qalacaq.
-Gürcüstan millisinin aşağı yaş qrupları üzrə komandalarında çıxış etmisiniz. Əsas yığmaya yüksələ bilməməyinizə nə səbəb oldu?
-Milli komandalarda oynadığım dönəmdə məşqlərə hər zaman ciddi yanaşırdım. Heç bir məşqi qaçırmırdım. Lakin bəzi qərarları düzgün vermədim. Qarşılaşdığımız hər şey təcrübədir. Mənə dəstək olanlara təşəkkür etmək istəyirəm. “Kəpəz” azarkeşlərindən çox xoş mesajlar aldım. Gəncə şəhərinin futbolu bu qədər sevdiyini bilmirdim. Mənim üçün sevindirici məqam oldu. İnanıram ki, hər şey yaxşı olacaq.
Bölmənin digər xəbərləri
