KİV: Messi “Barselona” ilə müqaviləni istənilən mövsümün sonunda poza bilər
Bakı, 6 sentyabr, AZƏRTAC
İspaniyanın “Barselona” komandasının argentinalı futbolçusu Lionel Messinin bu klubla bağladığı müqavilənin şərtlərinə görə, Messi istənilən yay transfer pəncərəsi çərçivəsində bu sazişi pozmaq hüququna malikdir.
AZƏRTAC “Qazeta.Ru” nəşrinə istinadən xəbər verir ki, İspaniyada çıxan “El Pais” qəzetinin yazdığına görə, klubla Messinin qüvvədə olan müqaviləsi 2021-ci ilə qədər nəzərdə tutulub, ancaq argentinalı 32 yaşa çatandan sonra hər mövsümün sonunda (30 iyun) öz gələcəyi haqqında qərar qəbul edə bilər. Bu il iyunun 24-də Messinin 32 yaşı tamam olub.
Bundan əvvəl “Barselona”nın keçmiş oyunçuları Karles Puyol, Havi və Andres İnyesta da bu komanda ilə belə müqavilələr imzalayıblar.
Messi “Barselona”nın heyətində on dəfə İspaniya çempionu, səkkiz dəfə İspaniya Superkubokunun, altı dəfə İspaniya Kubokunun sahibi, dörd dəfə Çempionlar Liqasının qalibi, üç dəfə UEFA Superkubokunun sahibi və üç dəfə klublar arasında dünya çempionatının qalibi olub. Argentinalı beş dəfə “Qızıl top” mükafatına layiq görülüb.
Bölmənin digər xəbərləri
