KLIVLEND KLINIKASININ MƏTBUAT ÜÇÜN MƏLUMATI

05 sentyabr, 2003-cü il

PREZIDENT ƏLIYEV KLIVLEND KLINIKASINDA ÖZÜNÜ RAHAT HISS EDIR

Klivlend Klinikasının həkimlərinin bu gün bildirdiyinə görə, Azərbaycan Respublikasının Prezidenti Heydər Əliyev ürək çatışmamazlığı ilə bağlı aldığı tibbi müalicəyə yaxşı reakisya göstərir.

Həkimlərin sözlərinə görə, prezidentin səhhəti ötən ay xəstəxanaya gəldiyi dövrdən bəri yaxşılaşmışdır. Prezident özünü rahat hiss edir.

***

DEBEYKİ KARDİOLOJİ MƏRKƏZİNİN DİREKTORU, BEYLOR UNİVERSİTETİ TİBB KOLLECİNİN PREZİDENTİ DOKTOR MAYKL DEBEYKİYƏ

Hörmətli doktor Debeyki,

Sizi – dünya şöhrətli tibb xadimini, məşhur kardioloqu, müasir ürək cərrahiyyəsinin banilərindən birini şanlı yubileyiniz, anadan olmağınızın 95 illiyi münasibətilə səmimi qəlbdən təbrik edirəm. Siz dərin məzmunlu ömrünüzü nəcib bir işə həsr edərək, insanların sağlamlığı naminə fədakarcasına fəaliyyət göstərmiş, xəstələrinizə şəfa, təbabət elminə misilsiz töhfələr vermişsiniz. Çox şadam ki, Siz bu gün də öz zəngin bilik və təcrübənizi böyük həvəs və səylə həmkarlarınıza çatdırırsınız. Şəxsi münasibətlərimiz, aramızdakı dostluq mənim üçün çox əzizdir. Kardioloji mərkəzinizlə tanışlığımı, Amerikada və Azərbaycanda keçirdiyimiz görüşləri, söhbətləri həmişə məmnunluqla xatırlayıram. Əziz Maykl Debeyki, Sizə möhkəm cansağlığı, xoşbəxtlik, işlərinizdə uğurlar diləyirəm.

Hörmətlə,

Heydər Əliyev,

Azərbaycan Respublikasının Prezidenti.

2 sentyabr, 2003-cü il.

***

BRAZİLİYA FEDERATİV RESPUBLİKASININ PREZİDENTİ ZATİ-ALİLƏRİ CƏNAB LUİS İNASİU LULA da SİLVAYA

Hörmətli cənab Prezident,

Braziliya Federativ Respublikasının milli bayramı – Müstəqillik elan edilməsi günü münasibətilə Sizi və xalqınızı ürəkdən təbrik edirəm. Ümidvaram ki, Azərbaycan ilə Braziliya arasında dostluq münasibətlərinin inkişafı əməkdaşlıq imkanlarının genişlənməsinə öz müsbət təsirini göstərəcəkdir. Sizə möhkəm cansağlığı, işlərinizdə uğurlar, ölkənizə əmin-amanlıq və firavanlıq arzulayıram.

Hörmətlə,

Heydər Əliyev,

Azərbaycan Respublikasının Prezidenti.

1 sentyabr 2003-cü il.

***

AZƏRBAYCAN ÇİNLƏ BÜTÜN SAHƏLƏRDƏ ƏMƏKDAŞLIĞIN GENİŞLƏNDİRİLMƏSİNDƏ MARAQLIDIR AZƏRBAYCAN RESPUBLİKASININ BAŞ NAZİRİ İLHAM ƏLİYEV ÇİNİN ALİ XALQ PROKURORLUĞUNUN NÜMAYƏNDƏ HEYƏTİNİ QƏBUL ETMİŞDİR

Azərbaycan Respublikasının Baş naziri İlham Əliyev sentyabrın 6-da Nazirlər Kabinetində Çin Xalq Respublikası Ali Xalq Prokurorluğunun Baş prokuroru Szya Çunvanın başçılıq etdiyi nümayəndə heyətini qəbul etmişdir. Qonaqları səmimiyyətlə qarşılayan Baş nazir İLHAM ƏLİYEV dedi: -Çin Xalq Respublikası Ali Xalq Prokurorluğunun Baş prokuroru hörmətli cənab Szya Çunvan, hörmətli qonaqlar. Mən sizin hamınızı səmimi qəlbdən salamlayıram, “Azərbaycana xoş gəlmisiniz!” deyirəm. Çinlə Azərbaycan arasında münasibətlər son illər ərzində çox sürətlə inkişaf edir. Xüsusilə, Azərbaycan Respublikasının Prezidenti cənab Heydər Əliyevin Çin Xalq Respublikasına rəsmi səfərindən sonra bu münasibətlər yeni pilləyə qalxmışdır. Ölkələrimiz arasında əlaqələr inkişaf edir, Azərbaycanla Çin arasında geniş ticarət əlaqələri mövcuddur. Çindən ölkəmizə böyük həcmdə mal idxal olunur. Əlbəttə, biz çox istərdik ki, iki ölkə arasında iqtisadi əlaqələr genişlənsin və hər iki tərəf üçün fayda versin. Çox sevindirici haldır ki, son illər ərzində Çindən olan şirkətlər Azərbaycanın neft sektoruna maraq göstərirlər. Artıq iki şirkət ölkəmizdə fəaliyyət göstərir. Azərbaycanda neft sektoru Heydər Əliyevin neft strategiyasının həyata keçirilməsi nəticəsində çox sürətlə inkişaf edir. Bu sahəyə böyük həcmdə sərmayələr qoyulmuşdur, dünya üçün əhəmiyyətli, irimiqyaslı layihələr həyata keçirilir. Əlbəttə, biz çox şadıq ki, Çini təmsil edən neft şirkətləri də bu layihələrə qoşulurlar və Azərbaycana böyük həcmdə sərmayələr qoyurlar. Azərbaycanda xarici sərmayəçilər üçün gözəl şərait yaradılmışdır və əminəm ki, Çinin neft şirkətləri də bu şəraitdən səmərəli istifadə edəcəklər. Çox sevindirici haldır ki, Çin Xalq Respublikası Ali Xalq Prokurorluğunun Azərbaycan Respublikasının Prokurorluğu ilə gözəl münasibətləri vardır. Bildiyimə görə, müvafiq əməkdaşlıq haqqında sazişlər imzalanmışdır və hesab edirəm ki, bu əlaqələr gələcəkdə də inkişaf etməlidir. Qonaqpərvərliyə görə Baş nazir İlham Əliyevə təşəkkür edən SZYA ÇUNVAN dedi: -Cənab Baş nazir, icazənizlə, bizi Nazirlər Kabinetində qəbul etdiyiniz üçün Çin Xalq Respublikası Ali Xalq Prokurorluğunun heyəti adından və şəxsən öz adımdan, habelə Çinin Azərbaycandakı fövqəladə və səlahiyyətli səfiri cənab Çjan Siyunun adından Sizə təşəkkürümü bildirim. Mənim səfərim Azərbaycan Respublikasındakı həmkarım cənab Baş prokurorun dəvəti ilə həyata keçirilir. Səfərimin əsas məqsədi ölkənizin hüquq sahəsi ilə, o cümlədən prokurorluq sistemi ilə yaxından tanış olmaq və təcrübə mübadiləsi aparmaqdan ibarətdir. Səfərimin digər əsas məqsədi iki ölkə arasında hüquq-məhkəmə sahəsində əlaqələri və münasibətləri gələcəkdə daha da genişləndirməkdir. Bu, mənim Azərbaycan Respublikasına ilk rəsmi səfərimdir. Səfərin ilk günündən Azərbaycan Prokurorluğunun və digər rəsmi orqanların rəhbərlərinin qayğıkeş münasibətinin şahidi olmuşam. Artıq iki gündür ki, Bakı şəhərindəyəm və paytaxtınızın görməli yerləri ilə tanış olmuşam. Azərbaycan xalqının Çin Xalq Respublikasına, ümumiyyətlə, Çin xalqına münasibəti ilə də yaxından tanış olmuşam və bu münasibətdən böyük şərəf hissi duyuram. Cənab Baş nazir, bildiyiniz kimi, səfər çərçivəsində dünən biz Çin Xalq Respublikasının Ali Xalq Prokurorluğu ilə Azərbaycan Respublikasının Baş Prokurorluğu arasında əməkdaşlığa dair saziş imzalamışıq. Ölkələrimiz və xalqlarımız arasındakı münasibətlər uzun tarixə malikdir. İki ölkənin sıx dostluq münasibətləri vardır. 1992-ci ilin aprelində Çinlə Azərbaycan arasında diplomatik münasibətlər yaranmışdır və bundan sonra ikitərəfli əlaqələr daim inkişaf etmiş və möhkəmlənmişdir. Azərbaycan Respublikasının Prezidenti cənab Heydər Əliyevin 1994-cü ildə Çinə rəsmi səfəri, habelə Çin Xalq Respublikası parlamentinin sədri cənab Li Penin Azərbaycana səfəri bu münasibətlərin daha da yüksək zirvəyə qaldırılmasına təkan vermişdir. Qeyd etdiyiniz kimi, ölkələrimiz arasında iqtisadiyyat və ticarət sahələrində əlaqələrimiz genişləndirilir. Bu əlaqələrin inkişaf etdirilməsi və daha yüksək pilləyə qaldırılması ölkələrimizin xalqlarının maraqlarına tam cavab verir. Cənab Baş nazir, bildiyiniz kimi, artıq 20 ildir ki, Çin Xalq Respublikasında müxtəlif sahələrdə, o cümlədən iqtisadiyyat və ticarət sahələrində mühüm islahatlar həyata keçirilir. Bir neçə ildir ki, Çin iqtisadiyyatının artımı 7,3 faiz təşkil edir. İslahatların keçirildiyi dövrdə biz sənayeni və ticarəti, bütün digər müvafiq sahələri inkişaf etdiririk, bu zaman yüksək texnologiyalardan istifadə olunur. Nəticədə ölkəmizin iqtisadiyyatı gündən-günə güclənir. Çin Xalq Respublikasının Konstitusiyasına əsasən, ölkəmizin Baş Prokurorluğu və prokurorluq orqanları nəzarət funksiyasını həyata keçirirlər. Onlar öz fəaliyyətini gündən-günə gücləndirir, ölkəmizdə sabitliyi qoruyur və inkişafı təmin edir. Konstitusiyaya əsasən, Prokurorluq Çin qanunlarının digər dövlət orqanları tərəfindən icrasının təmin olunmasına nəzarət edir. Çinin Ali Xalq Prokurorluğu ölkədə sabitliyi qorumaqla yanaşı, mənfi hallara, o cümlədən cinayətkarlığa qarşı mübarizə aparır və bu sahədə digər ölkələrin təcrübəsini öyrənməkdən şərəf duyur. Biz digər ölkələrin təcrübəsini öyrənməyə və ondan istifadə etməyə hazırıq. Azərbaycan Respublikası ilə də əməkdaşlığı möhkəmləndirməyə daim hazırıq. Deməliyəm ki, səfərimiz çox uğurlu keçir. Azərbaycan Respublikasının Prokurorluğu çox gözəl səfər proqramı tərtib etmişdir və onun müvəffəqiyyətlə keçməsi üçün hər cür imkan yaratmışdır. Nümayəndə heyətimiz Azərbaycanın Konstitusiya Məhkəməsinin sədri, Ali Məhkəmənin sədri, ədliyyə naziri ilə görüşlər keçirmişdir və biz bu görüşlərdə çoxlu faydalı məlumatlar toplamışıq.Cənab Baş nazir. Mən Çin Xalq Respublikası Baş nazirinin salamlarını, həmçinin Azərbaycan Respublikasının Baş naziri təyin edilməyiniz münasibətilə onun təbriklərini Sizə çatdırmaq istəyirəm. Sonda mən Azərbaycan Respublikasının cənab Heydər Əliyevin rəhbərliyi altında gələcəkdə daha çox nailiyyətlər qazanması arzularımı çatdırmaq istəyirəm. Sizin ölkəniz bu nailiyyətləri əldə edəcək, Azərbaycan xalqı firavan həyat sürəcəkdir. Bizim prokurorluq orqanları, ümumilikdə xalqlarımız arasında olan dostluq münasibətləri gələcəkdə daha da inkişaf edəcək, genişlənəcəkdir. Səmimi təbriklərə və ətraflı məlumata görə təşəkkür edən Baş nazir İLHAM ƏLİYEV dedi: - Xahiş edirəm, səmimi təbrikə görə cənab Baş nazirə mənim minnətdarlığımı bildirəsiniz. Əminəm ki, ölkələrimiz gələcəkdə bir-birinə daha da yaxın olacaqdır. Biz Çinlə iqtisadi, siyasi və digər sahələrdə əlaqələrin genişləndirilməsində çox maraqlıyıq, Azərbaycan hökuməti bundan sonra da bu istiqamətdə əməli işlərlə məşğul olacaq və əminəm ki, biz birlikdə böyük nailiyyətlər qazanacağıq. Son 20 il ərzində Çin Xalq Respublikasında aparılan iqtisadi islahatlar bizə məlumdur, bundan xəbərimiz vardır. Biz görürük ki, bu islahatlar ölkənizə və xalqınıza nə qədər xeyir gətirmişdir. Sizin keçdiyiniz yol bir çox ölkə üçün nümunədir və qazandığınız uğurlar bir daha göstərir ki, bu yol düzgün seçilmişdir. Yəqin ki, ölkənizdə hökm sürən ictimai-siyasi sabitlik, asayiş bütün bu uğurlar üçün gözəl zəmin yaratmışdır. Prezident Heydər Əliyevin rəhbərliyi ilə Azərbaycanda da böyük işlər görülmüşdür. İqtisadi islahatlar həyata keçirilmiş və bunun nəticəsində ölkəmiz iqtisadi baxımdan çox sürətlə inkişaf edir. Deyə bilərəm ki, bizdə də ümumi daxili məhsulun həcmi ildən-ilə artır. Son 6 ildə bu, orta hesabla 64-65 faiz təşkil etmişdir. Əminəm ki, gələckdə də bu islahatlar Heydər Əliyevin rəhbərliyi altında davam etdiriləcəkdir. Azərbaycanda da hökm sürən ictimai-siyasi sabitlik, asayiş iqtisadi uğurlarımızın əsas səbəblərindən biridir və hesab edirəm ki, bu cəhətdən ölkələrimiz arasında çox oxşar məqamlar vardır. Ona görə də biz bütün sahələrdə bir-birimizin təcrübəsini öyrənməkdə, ölkələrimizin daha da yaxınlaşmasında və mühüm əhəmiyyət kəsb edən işlər görülməsində maraqlıyıq. X X X Qəbulda Azərbaycan Respublikasının Baş prokuroru Zakir Qaralov, Prezidentin İcra Aparatının hüquq-mühafizə orqanları ilə iş şöbəsinin müdiri Fuad Ələsgərov, Çinin ölkəmizdəki səfiri Çjan Siyun iştirak edirdilər.

***

AZƏRBAYCAN RESPUBLİKASININ BAŞ NAZİRİ CƏNAB İLHAM ƏLİYEVƏ

Çox hörmətli cənab Baş nazir!

Yüksək vəzifəyə - Azərbaycan Respublikasının Baş naziri vəzifəsinə təyin olunmağınız münasibətilə Sizi MDB Qiymətləndiricilər Birlikləri Şurası adından təbrik edirəm. Geniş MDB məkanında İlham Əliyevi yeni minilliyin başlanğıcında suveren Azərbaycanın siyasi səmasında parlaq ulduz kimi tanıyırlar. Bir neçə ay əvvəl MDB Qiymətləndiricilər Birlikləri Şurası Bakıda qiymətləndiricilərin beynəlxalq konqresini keçirmişdir. Onun keçirildiyi vaxt zəmanəmizin görkəmli siyasi və dövlət xadimi, Azərbaycan Respublikasının Prezidenti Heydər Əlirza oğlu Əliyevin 80 illik yubileyinə təsadüf etmişdir. Bu konqresin iştirakçıları Azərbaycanın uğurlarını öz gözləri ilə görüb yəqin edə bildilər. Azərbaycanın son 10 ildəki sosial-iqtisadi tərəqqisi hörmət hissləri doğurmaya bilməz. Sizin Azərbaycan Respublikasının Baş naziri təyin olunmağınız barədə xəbər ümid yaradır ki, bu uğurlar artırılacaq, Heydər Əliyevin ənənələri və xətti davam etdiriləcək, Azərbaycan isə daha güclü və demokratik dövlət olacaqdır. Sizi əmin edirik ki, MDB ölkələrinin qiymətləndiriciləri peşəkarlar olaraq Azərbaycan Respublikasının iqtisadiyyatının inkişafına öz töhfələrini verməyə hazırdırlar.

Dərin hörmətlə,

Nikolay Trifonov,

MDB Qiymətləndiricilər Birlikləri Şurasının baş direktoru.

Minsk, 18 avqust 2003-cü il.