KOBİA Türkdilli Dövlətlərin Əməkdaşlıq Şurasının biznes forumunda təmsil olunub
Bakı, 10 noyabr, AZƏRTAC
Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov Türkdilli Dövlətlərin Əməkdaşlıq Şurasının (TDƏŞ) biznes forumunda iştirak edib.
KOBİA-dan AZƏRTAC-a bildirilib ki, O.Məmmədov forumda Azərbaycan və TDƏŞ-ə üzv ölkələrin biznes dairələri arasında əməkdaşlıq perspektivlərinə, bu istiqamətdə agentliyin göstərə biləcəyi dəstəyə dair fikirlərini bölüşüb. Qeyd olunub ki, türkdilli ölkələr arasında yüksələn xətlə inkişaf edən ikitərəfli və çoxtərəfli əlaqələr biznes sektorunda da əməkdaşlıq üçün geniş imkanlar yaradır. KOBİA TDƏŞ-ə üzv dövlətlərin bir sıra təsisatları ilə əməkdaşlıq edir. Yerli iş adamları ilə yanaşı, Azərbaycanda biznes fəaliyyəti ilə məşğul olan xarici sahibkarlar da KOBİA-nın xidmətlərdən istifadə etməkdədir. TDƏŞ-ə üzv ölkələrdə fəaliyyət göstərən kiçik və orta sahibkarlıq subyektləri arasında əlaqələrin gücləndirilməsi, yeni əməkdaşlıqların qurulması və inkişafı prioritet istiqamətlər sırasındadır. KOBİA Azərbaycanda biznes fəaliyyəti həyata keçirmək istəyənlərə müvafiq istiqamətdə dəstək göstərməyə, o cümlədən aidiyyəti qurumlarla əlaqələndirmə və etibarlı yerli tərəfdaşların müəyyən edilməsində kömək etməyə hazırdır. KOB-ların vahid platforma üzərindən əlaqələndirilməsi də TDƏŞ-ə üzv dövlətlər arasında iqtisadi əlaqələrin inkişafına öz töhfəsini verə bilər.
Bölmənin digər xəbərləri
