Komitə rəsmisi: Rəqəmsal mühitdə uşaqların hüquqlarının qorunması dövlətin əsas prioritetlərindəndir
Bakı, 18 dekabr, AZƏRTAC
Müəyyən yaş kateqoriyasına aid uşaqların zərərli informasiyadan qorunması ilk növbədə valideyn məsuliyyəti ilə bağlıdır və ailə mühitində uşaqlara təqdim olunan məlumatların tənzimlənməsi xüsusi əhəmiyyət daşıyır. Təəssüf ki, bəzi hallarda bu sahədə sui-istifadə hallarına rast gəlinir.
AZƏRTAC xəbər verir ki, bunu Ailə, Qadın və Uşaq Problemləri üzrə Dövlət Komitəsi (AQUPDK) tərəfindən “Uşaqların zərərli informasiyadan qorunması” mövzusunda brifinqdə qurumun Analitik təhlil və informasiya təminatı şöbəsinin müdiri Elgün Səfərov deyib.
Onun sözlərinə görə, son illər uşaqların sosial şəbəkələrə, xüsusilə TikTok platformasına cəlb edilməsi və bu yolla maliyyə vəsaiti əldə olunması halları müşahidə olunur. Bu cür yanaşmalar uşaqların hüquqlarının pozulmasına səbəb olur və ciddi narahatlıq doğurur. O vurğulayıb ki, digər sosial şəbəkələrdə də uşaqların hüquqlarının pozulması faktları qeydə alınır.
Son 5 il ərzində bəzi media subyektləri tərəfindən uşaqların hüquqlarını pozan, zərərli informasiya xarakteri daşıyan materiallar yayımlanıb. Xüsusilə uşaq nikahları ilə bağlı mövzuların preventiv məqsəd daşımadan, təbliğat formasında təqdim edilməsi yolverilməz hesab olunur. Onun sözlərinə görə, bu kimi hallarla bağlı AQUPDK tərəfindən müvafiq dövlət qurumları, o cümlədən Audiovizual Şura, hüquq-mühafizə orqanları və digər aidiyyəti strukturlarla sıx əməkdaşlıq həyata keçirilir.
Elgün Səfərov bildirib ki, sosial şəbəkələrdə uşaqların hüquqlarının pozulması halları aşkar edildikdə, hüquqi mexanizmlər dərhal işə salınır və preventiv tədbirlər görülür. Dövlət Komitəsinin bu sahədə əsas fəaliyyət istiqaməti maarifləndirmə və qabaqlayıcı tədbirlərin gücləndirilməsidir.
Azərbaycanda uşaq hüquqları ilə bağlı vahid Uşaq Məlumat Bankı yaradılıb və hazırda bu sistemin tam funksional fəaliyyəti istiqamətində işlər aparılır. Şöbə müdirinin sözlərinə görə, son iki il ərzində Uşaq Məlumat Bankı təkmilləşdirilib və gələcək mərhələdə 11-dən çox dövlət qurumunun, eləcə də 7 yerli icra hakimiyyəti orqanının məlumatları bu sistemə inteqrasiya olunacaq.
Dövlət Komitəsi tərəfindən “Media və uşaq hüquqları” mövzusunda metodik vəsait hazırlanaraq media subyektlərinə, həmçinin Mətbuat Şurasına təqdim olunub. Bununla yanaşı, internet təhlükəsizliyi ilə bağlı digər maarifləndirici materialların da mövcud olduğu diqqətə çatdırılıb.
Uşaqların və valideynlərin maarifləndirilməsi istiqamətində ölkə üzrə genişmiqyaslı tədbirlər həyata keçirilir. Bu tədbirlər regionlardan başlayaraq respublika səviyyəsində davam etdirilir və təhsil müəssisələrini, sosial şəbəkələri, eləcə də Dövlət Komitəsinin rəsmi “YouTube” kanalı və digər platformaları əhatə edir.
Qeyd edilib ki, uşaqların maraqlarının qorunması əsas prioritetdir, kiberbullinq, intihara sövq etmə və digər hüquq pozuntuları ilə bağlı mövcud risklərə diqqət çəkilib. Elgün Səfərov bildirib ki, bu sahədə mövcud çağırışları nəzərə alaraq, Dövlət Komitəsi tərəfindən uşaq hüquqlarına dair yeni Milli Fəaliyyət Planının layihəsi hazırlanıb. Sənəddə rəqəmsal mühitdə süni intellektin uşaqlara təsiri, onun həm müsbət, həm də mənfi tərəflərinin araşdırılması və innovativ yanaşmaların tətbiqi nəzərdə tutulur.
Bölmənin digər xəbərləri
