DÜNYA
KONDOLİZA RAYS: QAZAXISTAN MƏRKƏZİ ASİYADA ABŞ-IN ƏSAS TƏRƏFDAŞLARINDANDIR
Qazaxıstan Mərkəzi Asiya regionunda sabitlik adası, sabitliyin və təhlükəsizliyin möhkəmlənməsində ABŞ-ın əsas tərəfdaşlarındandır. AZƏRTAC Kazinform agentliyinə istinadla xəbər verir ki, bunu ABŞ-ın dövlət katibi Kondoliza Rays Astanadakı Avrasiya Milli Universitetinin tələbə və müəllimləri ilə görüşündə bildirmişdir.
K.Rays demişdir: “Biz iqtisadi baxımdan yaxşı tərəfdaşlarıq. ABŞ Qazaxıstan iqtisadiyyatına xeyli sərmayə qoymuşdur və bu, artacaqdır. Təhlükəsizlik sahəsində də münasibətlərimiz yaxşıdır. Biz beynəlxalq terrorizm və dini ekstremizmlə mübarizə istiqamətində də sıx əməkdaşlıq edirik. Qazaxıstan İraqda sülhün və sabitliyin qorunub saxlanmasında fəal iştirak edir”.
Xanım Raysın sözlərinə görə, Birləşmiş Ştatlar suveren dövlətlərə demokratik islahatları necə aparmaq barədə göstəriş verə bilməz və verməməlidir. Hər bir ölkə öz xüsusiyyətlərindən asılı olaraq, demokratik islahatlar aparılmasının forma və metodlarını özü seçməlidir.