Küveytdə kommersiya əhəmiyyətli yeni neft və qaz ehtiyatları tapılıb
Qahirə, 22 yanvar, AZƏRTAC
Küveytin ərazi sularında yerləşən Culay’a dəniz yatağında böyük həcmdə kommersiya əhəmiyyətli orta sıxlıqlı neft və səmt qazı ehtiyatları kəşf olunub.
AZƏRTAC “əl-Cəridə” qəzetinə istinadla xəbər verir ki, Küveytin Neft Şirkəti “Culay’a 2” kəşfiyyat quyusunda aparılan sınaqların ümidverici nəticələr verdiyini elan edib. Yatağın sahəsi 74 kvadratkilometrdir. İlkin qiymətləndirmələrə görə, yataqda təqribən 800 milyon barel orta sıxlıqlı, hidrogen sulfid qazından azad və aşağı faizli karbon qazı ehtiva edən neft və 600 milyard kubmetr səmt qazı vardır ki, bu da 950 milyon barel neft ekvivalentinə bərabərdir.
Şirkət qeyd edib ki, bu kəşf Küveytin karbohidrogen ehtiyatlarına əhəmiyyətli töhfədir və bölgədə, xüsusən də yuxarı Tabaşir dövrünə aid dəniz və ətraf ərazilərdə əlavə neft-qaz yataqlarının mövcud olma ehtimalını gücləndirir. Şirkət əlavə edib ki, Culay’a yatağı 2024-cü ilin iyul ayında Nouxaza dəniz yatağının kəşfindən sonra hazırkı kəşfiyyat planı çərçivəsində aşkar edilən ikinci dəniz neft yatağıdır.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
