Küveytin media rəhbəri Azərbaycanın Zəfər Gününə həsr olunmuş məqalə ilə çıxış edib
Bakı, 7 noyabr, AZƏRTAC
8 Noyabr - Zəfər Günü münasibətilə Küveyt və Ərəb Elektron Media Birliklərinin rəhbəri Feysəl Xəlifə əl-Səvvağın müəllifi olduğu “Azərbaycan Ordusu 30 il işğal altında olan torpaqlarını Ermənistandan azad edib” başlıqlı məqalə “dasmannews.com” elektron qəzetinin 7 noyabr 2023-cü il tarixli buraxılışında dərc olunub.
AZƏRTAC xəbər verir ki, məqalədə Azərbaycan xalqının şanlı Qələbənin üçüncü ildönümünü qeyd etdiyi diqqətə çatdırılıb. Müəllif yazıb ki, Silahlı Qüvvələrin Ali Baş Komandanı Prezident İlham Əliyevin mahir rəhbərliyi Azərbaycanın Qələbəsinin ən mühüm amillərindən biridir.
Yazıda qeyd olunub: "Bu il Azərbaycan xalqı Vətən müharibəsində şanlı Qələbənin üçüncü ildönümünü - 8 Noyabr Zəfər Gününü böyük sevinc və iftixar hissi ilə qeyd edir. Bu Qələbə qalib Ali Baş Komandan, Azərbaycan Respublikasının Prezidenti cənab İlham Əliyevin qüdrətli rəhbərliyi, qəhrəman Azərbaycan Ordusunun şücaəti, şəhidlərin qanı bahasına əldə edilib. Bu Qələbə ilə Azərbaycan torpaqlarının 30 illik işğalına son qoyuldu və Azərbaycan Respublikasının ərazi bütövlüyü bərpa edildi. Bu Qələbə bütün dünyaya göstərdi ki, Azərbaycan xalqı öz Prezidentinin ətrafında bir yumruq kimi birləşib və Azərbaycan Respublikasının hərbi və iqtisadi gücü var".
Küveyt oxucularının diqqətinə çatdırılıb ki, 2023-cü il noyabrın 8-də Azərbaycan mədəniyyətinin beşiyi, Qarabağın incisi və tacı sayılan Şuşa şəhəri işğaldan azad edilib. Bu sözlər Şuşa haqqında ona görə deyilir ki, o, gözəlliyi ilə görənləri heyran etməklə yanaşı, bir çox Azərbaycan mədəniyyət xadimləri - yazıçılar, şairlər, musiqiçilər Şuşada doğulub yaşayıblar.
Müəllif yazıb ki, 1991-ci ildə müstəqillik əldə etdikdən sonrakı ilk illərdə Azərbaycan bir çox çətinliklərlə üzləşib. Keçmiş Sovet İttifaqı respublikaları ilə Azərbaycan Respublikası arasında iqtisadi əlaqələrin dağılması, respublika ərazisində qeyri-sabitliyin olması, maddi-texniki təminatın azalması neft-qaz sənayesini ciddi böhran vəziyyətinə salıb. Digər tərəfdən, qonşu Ermənistan Qarabağ bölgəsində separatçılara dəstək verərək, həmin rayonu və ətraf 7 rayonu işğal edib. Azərbaycanın beynəlxalq birlik tərəfindən tanınan ərazisinin 20 faizi işğal olunub. Qeyd edilən işğal nəticəsində bir milyondan çox azərbaycanlı öz doğma yurdundan qovulub, etnik təmizləməyə məruz qalıb. İşğal olunmuş ərazilərdə şəhər və kəndlər tamamilə yerlə-yeksan, tarixi, mədəniyyət və dini abidələr təhqirlərə məruz qalıb, qəsdən dağıdılıb. BMT Nizamnaməsinin 51-ci maddəsinə əsasən, Azərbaycanın özünümüdafiə hüququnun olmasına baxmayaraq, Azərbaycan Respublikası beynəlxalq hüququn hamılıqla tanınmış prinsip və qaydalarına riayət etməklə daim sülhsevər siyasət yürüdüb. Lakin bütün cəhdlərə rəğmən Ermənistan işğalçı siyasətindən əl çəkməyib.
Məqalədə vurğulanıb ki, 2020-ci il sentyabrın 27-də Ermənistanın növbəti hərbi təxribatlarına cavab olaraq Azərbaycan Ordusu əks-hücum əməliyyatına başlamaq məcburiyyətində qalıb. 44 gün davam edən Vətən müharibəsi 2020-ci il noyabrın 10-da Ermənistanın 30 ilə yaxın davam edən işğalına son qoyaraq, Azərbaycan Ordusunun şanlı Qələbəsi ilə başa çatıb. Qələbə ilə başa çatan və yüksək peşəkarlıqla həyata keçirilən qısamüddətli hərbi əməliyyatlar “Dəmir yumruq” əməliyyatları adlanırdı. Bu Qələbədə mühüm rol oynamış dost ölkələrin siyasi və diplomatik dəstəyi Azərbaycan tərəfindən yüksək qiymətləndirilir.
Müəllif diqqətə çatdırıb ki, Vətən müharibəsi 2020-ci il noyabrın 10-da Azərbaycan Respublikası və Rusiya Federasiyasının prezidentləri və Ermənistan Respublikasının baş naziri arasında imzalanmış üçtərəfli Bəyanatla başa çatıb. Bəyanatın şərtlərinə əsasən, Rusiya sülhməramlılarının 5 il müddətinə Qarabağ bölgəsində yerləşdirilməsinə icazə verilib və Ermənistan Respublikası Ağdam, Kəlbəcər və Laçın rayonlarını qrafikə uyğun olaraq Azərbaycana qaytarmağı öhdəsinə götürüb.
Məqalədə işğaldan azad edilmiş ərazilərdə bərpa-quruculuq işləri barədə məlumat verilib, həmçinin separatçıların növbəti terror aktlarına cavab olaraq, Azərbaycan sentyabrın 19-da Qarabağ bölgəsində 24 saata yaxın lokal xarakterli antiterror tədbirləri keçirdiyi, beləliklə, tam suverenliyini bərpa etdiyi vurğulanıb.
Müəllif sonda yazıb: "Bu gün hamı bilir ki, Azərbaycan Respublikası istədiyinə nail olub, tarixi ədaləti, beynəlxalq hüququ bərpa edib".
Bölmənin digər xəbərləri
