KXDR hökuməti ölkədə koronavirusa yoluxanların olmadığını bəyan edib
Bakı, 13 aprel, AZƏRTAC
Şimali Koreyada indiyədək koronavirus infeksiyasına heç bir yoluxma halı aşkarlanmayıb.
AZƏRTAC KXDR dövlət informasiya agentliyinə istinadla xəbər verir ki, bu məlumat ölkənin Nazirlər Kabinetinin hesabatında əks olunub. Hesabatda bildirilir ki, COVID-19 xəstəliyinin qarşısını almaq istiqamətində ümumdövlət miqyasında aparılan tibbi müşahidələr və izolyasiya üzrə görülən işlər nəticəsində bu günədək ölkədə bir nəfər də olsun yoluxan şəxsə rast gəlinməyib.
Agentlik bildirir ki, KXDR-in hakimiyyət orqanları COVID-19 xəstəliyinin yayılması təhlükəsi səbəbindən yanvarın sonlarında fövqəladə vəziyyət rejimində hərəkət etmək üçün tədbirlər görüb. O cümlədən Çinlə sərhədlər bağlanıb, ölkəyə gələn əcnəbilərin yoxlanması sərtləşdirilib. Fevralda əcnəbilər, xaricdən qayıdan KXDR vətəndaşları və onlarla təmasda olan şəxslər üçün karantin müddəti 30 günədək uzadılıb.
Aprelin əvvəlinə olan məlumata görə, Şimali Koreyanın bütün ərazisində 500-ə yaxın insan karantində qalıb, 2,2 min KXDR vətəndaşı və iki əcnəbi şəxs təcrid şəraitində olub.
Bölmənin digər xəbərləri
