Laçın yolunun başlanğıcında sərhəd-buraxılış məntəqəsinin qurulması erməni ideologiyasının sonu oldu - Şərh
Bakı, 28 aprel, AZƏRTAC
Azərbaycan Vətən müharibəsindən sonra qarşıya qoyduğu hədəflərə ardıcıl şəkildə, inamla və sürətlə irəliləməkdə davam edir. Ermənistan və onun havadarlarının isə fərqli yollarla maneçilik törətmə cəhdləri iflasa uğradı. Prezident İlham Əliyev diplomatik və siyasi təcrübəsi əsasında mümkün ola biləcək bütün təhdidlərin aradan qaldırılması istiqamətində bir sıra mühüm addımlar atdı. Azərbaycan humanitar məqsədlər üçün Laçın dəhlizinə icazə verərkən paralel olaraq, beynəlxalq ictimaiyyətə açıq mətnlə bildirdi ki, Laçın yolunun başlanğıcında nəzarət məntəqəsi quraşdıracaq. Ermənistan isə hər zaman olduğu kimi, etinasız yanaşaraq dəhlizdən sui-istifadə hallarını genişləndirərək qeyri-qanuni daşınmaları həyata keçirirdi. Belə ki, Ermənistan ölkəmizin təbii sərvətlərini talayır və 2021-ci il istehsalı olan minaları daşınaraq çirkin əməllərini bir daha nümayiş etdirirdi. Ona dəstək olan müəyyən qüvvələr, bəzi beynəlxalq insan hüquq və azadlıq təsisatları Ermənistanın qanunsuz əməllərini görməzdən gələrək azərbaycanlılara qarşı mina terrorları ilə bağlı səslərini çıxarmadılar.
Bu fikirləri AZƏRTAC-a açıqlamasında politoloq Tural Əliyev vurğulayıb.
“2022-ci il dekabrın 12-dən Qarabağda faydalı qazıntı yataqlarının qanunsuz istismarının dayandırılmasını, “Qızılbulaq” və “Dəmirli” yataqlarında monitorinqin keçirilməsinə icazə verilməsini tələb edən azərbaycanlı könüllü gənclərin və ekofəalların Şuşa ərazisindən keçən Laçın-Xankəndi yolunda keçirdikləri etiraz aksiyası başladı. Ermənistanı dəstəkləyən dövlətlər isə ekoaksiyanı fürsət bilib, ucuz şou gündəmi qurmağa niyyətləndilər. Yalnız unutduqları həqiqətləri və reallıqları hesaba ala bilmədilər. Belə ki, onlar Azərbaycanın gücünü tam olaraq qavramaqda çətinlik yaşadılar.
“Etnik təmizləmə” kimi saxta, yalan və heç bir əsası olmayan xəbərlər tirajlayan bəzi xəbər saytları, satın alınmış siyasətçilər, parlament nümayəndələri növbəyə düzülərək Azərbaycana qarşı böhtan kampaniyasına start verdilər. Məqsədləri Azərbaycanı haqlı olduğu yoldan çəkindirmək, müxtəlif siyasi don geyindirməklə diqqəti tamam başqa səmtə yönəltmək idi. Ölkəmizin çevik xarici siyasəti nəticəsində beynəlxalq hüquqi normativlər çərçivəsində gözlənilən təhlükələr bloklandı. Bəzi xarici dairələrin dövlətimizə qarşı diplomatik hücumları fikirdən əmələ keçmədi. Həmin dairələr prosesin Azərbaycanın nəzarəti altında olduğu və buna qarşı tab gətirə bilməcəyəklərini anlamaq üzrədirlər”,-deyə T.Əliyev vurğulayıb.
O bildirib ki, Azərbaycanın həm müharibəyə qədər, həm də sonrakı tələbi bir qarış belə torpağın güzəştə gedilməyəcəyi üzərində idi, ancaq Ermənistan siyasi rəhbərliyi mesajların dərin mahiyyətinə məsuliyyətsizlik göstərərək kimlərəsə və nələrəsə arxayın olaraq işğal siyasətlərini əbədiləşdirəcəklərini düşünürdülər. Dövlətimizin başçısı bütün beynəlxalq platformalarda dünya ölkələrindən Ermənistanın törətdiyi cinayətlərinə və işğala ədalətli yanaşmağı tələb edirdi. Əks halda, Azərbaycan Ordusunun öz torpaqlarını hər an işğaldan azad etməyə hazır olduğunu bildirirdi. Zaman yetişdi, Azərbaycan BMT Təhlükəsizlik Şurasının qətnamələrinin icrasını öz üzərinə götürdü. Belə ki, müzəffər Ordumuz torpaqlarını düşmən işğalından azad edərək suverenliyini Qarabağ üzərində bərpa etdi. Görünən odur ki, qarşı tərəf yenə də doğru-dürüst nəticə çıxarmaq istəmir.
Politoloq deyib: “Aprelin 23-də Azərbaycan Respublikası Dövlət Sərhəd Xidmətinin bölmələri tərəfindən ölkəmizin suveren ərazilərində, Ermənistan ilə sərhəddə, Laçın-Xankəndi yolunun başlanğıcında sərhəd-buraxılış məntəqəsinin qurulması illərdi uydurulan tarixi erməni ideologiyasının sonu oldu. Çünki öz varlıqlarını başqalarının torpaqları hesabına sürdürən erməni şovinizmi Azərbaycanın gücü önündə bütün imkanlarından məhrum edildi. Uzun bir müddət ərzində regionda maraqları olan dövlətlərin siyasi alətinə çevrilən Ermənistan böyük bir ideoloji boşluğa düşdü. Həqiqətə söykənməyən istənilən təhlükəli cərəyanlar məhvə məhkumdur. Qarabağda yaşayan etnik ermənilərin separatçı qondarma rejimin girovluğundan çıxıb Azərbaycanın vətəndaşı olmaqdan başqa yolu qalmayıb. Bununla bağlı Ermənistandakı revanşist qüvvələr də barışa çağırış etməlidirlər”.
T.Əliyev əlavə edib ki, Azərbaycan Prezidentinin müsahibələrində verdiyi bütün mesajlar mütləq qaydada icra olunur. Ermənistan və havadarları artıq reallıqlarla barışmağa məcburdurlar. Ölkəmiz regionda sülh naminə atılan bütün addımları alqışlayır. Bunun əksinə olaraq, alternativini düşünən və puç olmuş xəyalların yenidən qayıtmasını arzulayan dairələr isə acı məğlubiyyətlə üzləşəcəklər.
Bölmənin digər xəbərləri
