REGİONLAR
Lənkəran Dövlət Dram Teatrında yeni tamaşanın məşqlərinə başlanılıb
Lənkəran, 29 yanvar, Bağır Əliyev, AZƏRTAC
Nəcəf bəy Vəzirov adına Lənkəran Dövlət Dram Teatrında yeni tamaşanın məşqlərinə başlanılıb.
Teatrın ədəbi-dram hissə rəhbəri Ağaddin Babayev AZƏRTAC-ın bölgə müxbirinə bildirib ki, yeni tamaşa fransız dramaturqu Marsel Berkye-Marinyenin “Oğru” komediyası əsasında hazırlanıb.
Kasıb bir fransız ailəsində klassik üçlük - ər, arvad və məşuqə arasındakı münasibətlərdən bəhs edən səhnə əsərinin quruluşçu rejissoru Əməkdar incəsənət xadimi Oruc Qurbanov, səhnə tərtibatçısı rəssam Tərlan Sadıxov, musiqi tərtibatçısı Miranda Qurbanovadır.
Əməkdar artist Sucəddin Mirzəyevin, aktyorlardan Aynur Əhmədovanın, Sayad Əliyevin və Nizami Qurbanovun rol aldıqları yeni tamaşanın martın birinci ongünlüyündə təhvil veriləcəyi nəzərdə tutulur.
Teatrda, həmçinin Xanımana Əlibəylinin 100 illik yubileyinə töhfə olaraq onun “Ləpələrin nağılı”, türk yazarı Suat Dərvişin “Fosforlu Cevriyyə” və Əli Əmirlinin “Hasarın o üzü” əsərlərinin tamaşaya qoyulması planlaşdırılıb.