LƏNKƏRAN ŞƏHƏRİ İCRA HAKİMİYYƏTİNİN BAŞÇISI SÜLEYMAN MİKAYILOVUN ÇIXIŞI
İcazə verin, Sizi rayon ictimaiyyətinin adından ürəkdən salamlayım, Azərbaycanımızın dilbər guşələrindən biri olan Lənkərana “Xoş gəlmisiniz!” deyim.
Zati-aliləri, Sizin Lənkərana hər gəlişiniz rayonda əsil bayrama çevrilir, xoş əhval-ruhiyyə yaradır. Sizin regionlara səfərləriniz həmişə yeni obyektlərin təməlqoyma və açılış mərasimləri ilə xalqımızı sevindirir. Bu gün də şəhərimizdə Sizin xeyir-duanızla tikilmiş müxtəlif obyektlər istifadəyə verilir.
Cənab Prezident, ümummilli liderimiz Heydər Əliyevin Vətənimizin tərəqqisi və müstəqilliyi naminə həyata keçirdiyi möhtəşəm işlər xalqımızın yaddaşında silinməz izlər qoymuşdur və onu qəlbimizdə daim yaşadır. Ulu öndərimizin sürətli quruculuq işləri nəticəsində Azərbaycan böyük inkişaf yolu keçmişdir. O dövrdə Lənkəran onun diqqət və qayğısı ilə respublikamızın qabaqcıl rayonlarından birinə çevrilmişdir. Onun Lənkərana səfərləri yeni sənaye müəssisələrinin, sosial obyektlərin açılışları ilə əlamətdar olmuşdur. Ümummilli liderimizin Lənkərana hədiyyələri olan Xanbulaqçay dəryaçası, Lənkəran Dövlət Dram Teatrı, onlarca zavod, fabrik, təhsil, səhiyyə müəssisələri, mədəniyyət ocaqları burada yaşayan insanlara bu gün də xidmət edir.
Möhtərəm Prezident, müstəqillik dövründə ümummilli liderimiz Heydər Əliyev tərəfindən dövlətimizin inkişafına və xalqımızın güzəranının yaxşılaşdırılmasına yönəldilmiş siyasət Sizin tərəfinizdən uğurla davam etdirilir. Sizin də regionlara ardıcıl səfərləriniz və bölgələrin inkişafına xüsusi diqqət və qayğı ilə yanaşmağınız məhz ulu öndərimizin bu sahədə başladığı işlərin davamıdır. Sizin Lənkərana xüsusi diqqət və qayğınız sayəsində rayonumuz gündən-günə çiçəklənir və inkişaf edir.
Regionların sosial-iqtisadi inkişafı Dövlət proqramı ölkəmizin hər yerində olduğu kimi, Lənkəranda da uğurla həyata keçirilir. Yeni istehsal müəssisələri və iş yerləri açılır. İqtisadiyyatın inkişafı üçün infrastruktur yaradılır, sosial problemlər həll olunur, insanların rifah halı yüksəlir. Bu gün Sizin qayğınız nəticəsində yeni hava limanı, sosial-iqtisadi obyektlər, müasir məktəb binaları tikilir, yollar salınır. Xüsusilə, Sizin təşəbbüsünüzlə üç istiqamətdə rayonun dağ kəndlərinə çəkilən yollar çətin şəraitdə yaşayan insanlar üçün əsil həyat yoludur. Rayonun abadlaşdırılması sahəsində görülən işlər də Lənkəranın keçmiş şöhrətini özünə qaytarır. Onu yenidən dəniz mirvarisinə çevirir. Bütün bunları lənkəranlılar minnətdarlıqla qarşılayırlar.
Cənab Prezident, Siz lənkəranlıların xoş günlərində də, ağır vaxtlarında da həmişə onlarla birlikdə olmusunuz. 2004-cü ildə Lənkəran şəhərində baş vermiş qəza zamanı dərhal fəlakətlə üzləşmiş insanları qayğınızla əhatə etdiniz, onlara həyan oldunuz. Lənkəranlılar bu qayğıkeşliyinizi heç vaxt unutmurlar. Sizin xeyir-duanızla təməli qoyulmuş müalicə-diaqnostika mərkəzi təkcə Lənkəran rayonunun deyil, bütün cənub bölgəsinin əhalisi üçün çox əhəmiyyətli müalicə ocağıdır. Şəfasını böyük ümidlə onun açılışı ilə bağlayan xəstələr Sizə minnətdardırlar.
Cənab Prezident, regionların inkişafı ilə bağlı görülən tədbirlər nəticəsində rayonun iqtisadi və mədəni həyatında böyük uğurlar əldə edilmişdir. Xüsusilə kənd əməkçilərinə göstərdiyiniz qayğı nəticəsində aqrar sahədə qazanılan uğurlar çox sevindiricidir. Kənd əməkçiləri dövlət səviyyəsində göstərilən qayğıdan ruhlanaraq bu il bol və keyfiyyətli məhsul yetişdirmişlər. Məhsulun bir hissəsini isə Sizin təşəbbüsünüz və göstərişinizlə Bakı şəhərində təşkil olunmuş yarmarkalarda satırlar.
Möhtərəm cənab Prezident, icazə verin, Sizi əmin edim ki, Vətənimizin tərəqqisi və inkişafı naminə qarşımıza qoyduğunuz vəzifələrin yerinə yetirilməsində lənkəranlılar öz səylərini bundan sonra da artıracaq və var qüvvələri ilə çalışacaqlar.
Bölmənin digər xəbərləri
