Lens Stroll: Formula 1 Azərbaycan Qran-Prisində finişdə üçüncü ola bilərdim
Bakı, 2 may, AZƏRTAC
Formula 1 Azərbaycan Qran-Prisində səkkizinci yer tutan “Williams”ın pilotu Lens Stroll hesab edir ki, o, müəyyən vəziyyət müqabilində Bakıda finişə üçüncü çata bilərdi.
AZƏRTAC-ın məlumatına görə, hər şeyin mümkün olduğunu bildirən L.Stroll deyib: “Biz gördük ki, Peres finişdə üçüncü oldu. Halbuki o, birinci təhlükəsizlik maşını getdikdən sonra mənim arxamca, özü də tamamilə başqa mövqedə gəlirdi. Yürüşü bu nöqteyi-nəzərdən təhlil etmək çox çətindir. Peresin strategiyası, yəqin daha yaxşı idi. Biz, sadəcə, xal toplamaq istəyirdik. Bu səbəbdən də təhlükəsiz hərəkət edirdik. Ümumiyyətlə, mən razıyam. Bir çox pilotlar səhvə yol verirdilər, mən isə çox çətin şəraitdə mübarizəni davam etdirirdim. Nəticələrimiz ideal olmasa da, biz məmnunuq. Bu, böyük stimuldur. Son mərhələlər ərzində biz çox zəhmət çəkdik və bu vəziyyətdən sonra xal qazanmaq çox vacibdir. Biz indi oturub gözləyə bilmərik. İnadla çalışmaq və Barselonaya hazırlaşmaq lazımdır ki, orada da Bakıda qazandığımız nəticəni əldə edək”.
Bölmənin digər xəbərləri
