LİLİPUTLARIN BEYNƏLXALQ MÜZİK-HOLLU BAKILILARIN QONAĞIDIR
Liliputların beynəlxalq müzik-hollunun 20 nəfərlik qrupu Azərbaycan paytaxtının qonağıdır. Dünyanın bir çox ölkələrində, o cümlədən ABŞ-da, Almaniyada, Yaponiyada, Yunanıstanda, MDB ölkələrində olmuş müzik-hollun artistləri iki həftə ərzində Bakı Dövlət Sirkinin meydançasında tamaşaçılarımıza yumor bəxş edəcəklər. Tamaşaya gələn uşaqlar da, böyüklər də buranı xoş ovqatla tərk edəcəklər. Axı, dünyanın boyu 70 santimetr olan ən kiçik adamının ifasında kordebaleti ancaq burada görmək olar. Uşaqlar isə təlim görmüş ekzotik heyvanlara - 5 metrlik anakondaya, meymunlara, habelə itlərə və göyərçinlərə tamaşa edəcəklər. Klounlar isə bütün axşamı kiçik tamaşaçıları şənləndirəcəklər. Maraqlıdır ki, liliputların beynəlxalq müzik-hollunun artistləri tamaşaya bəstəkar Emin Sabitoğlunun mahnısı ilə başlayırlar.
Müzik-holun qastrolları mayın 26-dək davam edəcəkdir.
Bölmənin digər xəbərləri
