LOT aviaşirkətinin təyyarəsi təcili qaydada Bakıya qayıdıb
Bakı, 3 may, AZƏRTAC
Bu gün səhər saatlarında Bakıdan Varşavaya uçuş yerinə yetirən “LOT Polish Airlines” aviaşirkətinə məxsus “Boeing 737” tipli hava gəmisinin kapitanı, göyərtədəki sərnişinlərdən birinin səhhətinin qəfil pisləşməsi səbəbi ilə Heydər Əliyev Beynəlxalq Aeroportuna geri dönmək qərarı almış və məcburi eniş sorğusu göndərib.
Beynəlxalq hava limanından AZƏRTAC-a bildirilib ki, hava gəmisi saat 07:45-də Bakı hava limanına uğurla eniş edib. Enişdən dərhal sonra təyyarəyə tibbi xidmət əməkdaşları yönləndirilib, sərnişinə yerində ilkin tibbi yardım göstərilib. Həkimin qərarına əsasən, sərnişinin uçuşu davam etdirməsinə icazə verilməmiş və o, tibbi nəzarətə götürülüb.
Eyni zamanda, kapitanın göstərişi ilə hava gəmisinin əlavə texniki baxışa ehtiyacı olduğu bildirildiyindən, digər sərnişinlər təyyarədən təxliyə edilərək hava limanında müvəqqəti yerləşdirilib.
Qeyd edək ki, Heydər Əliyev Beynəlxalq Aeroportu sərnişinlərin təhlükəsizliyini və rifahını hər zaman prioritet olaraq qəbul edir və bu kimi hallarda operativ koordinasiya ilə beynəlxalq xidmət standartlarına uyğun yüksək səviyyəli əməliyyat tədbirlərini həyata keçirməyə davam edir.
Bölmənin digər xəbərləri
