Macarıstan günəş panelli dam örtüklərinə investisiya qoymağa davam edir
Budapeşt, 11 may, AZƏRTAC
Macarıstanın “Terran” kompaniyası Budapeşt Texnologiya və İqtisadiyyat Universiteti ilə bilikdə dam örtüyü üçün günəş panelləri quraşdırılmış plitələrin hazırlanması üzrə proqramın inkişafı layihəsi üzərində işləyir.
AZƏRTAC xəbər verir ki, layihənin ümumi dəyəri 3 milyon avrodur. Macarıstan şirkəti bildirib ki, layihənin tərəfdaşları Milli Tədqiqatlar, İnkişaf və İnnovasiyalar Fondundan 1,2 milyon avro məbləğində maliyyə dəstəyi alıblar.
“Terran” kompaniyası və yuxarıda adı çəkilən universitet günəş panelləri olan mövcud dam örtüyünü asanlıqla genişləndirməyə və zərər görmüş plitələri hissələrə ayıraraq əvəz etməyə imkan verən modul sistemi üzərində işləyir. Artıq kompaniyanın “Generon” markalı mövcud qara plitəsini tamamlayacaq terrakota rəngində günəş plitəsinin prototipi hazırlanıb. Üç il müddətinə nəzərdə tutulan layihə bu ilin noyabrında başa çatmalıdır.
Kompaniyanın məlumatına görə, ötən il 100 mindən artıq “Generon” plitələri satılıb. Bununla yanaşı, kompaniya ildə 550 min günəş plitələri istehsal edə bilər. İctimaiyyətə açıqlanan məlumata əsasən, 2021-ci ildə firmanın satışdan əldə etdiyi xalis gəlir 60 milyon avro təşkil edib.
Vüqar Seyidov
AZƏRTAC-ın xüsusi müxbiri
Budapeşt
Bölmənin digər xəbərləri
