Maqnus Karlsen dünya şahmat tacını Vişvanatan Anandın əlindən almışdır
Bakı, 23 noyabr (AZƏRTAC). Norveç şahmatçısı Maqnus Karlsen Hindistanın Çennay şəhərində şahmat üzrə dünya çempionu adı uğrunda keçirilən matçda Hindistan şahmatçısı Vişvanatan Ananda vaxtından əvvəl qalib gəlmişdir.
Karlsenin ağ fiqurlarla oynadığı onuncu partiyada 65-ci gedişdə heç-heçə qeydə alınmışdır.
Bu oyundan sonra V.Anand dünya çempionu adını saxlamaq imkanından məhrum olmuşdur, çünki 12 partiyadan ibarət matçda hesab namizədin xeyrinə 6,5-3,5 olmuşdur.
Xatırladaq ki, V.Anand 2007-ci ildə dünyanın ən güclü şahmatçılarının turnirində qazandığı çempion adını Vladimir Kramnik, Veselin Topalov və Boris Gelfandla matçlarda qoruyub saxlamışdır.
FİDE-nin siyahısında ən yüksək reytinq əmsalına malik olan M.Karlsenin noyabrın 30-da 23 yaşı tamam olacaqdır.
M.Kalsen Londonda namizədlərin turnirində əlavə göstəricilər üzrə yekun protokolunda rusiyalı Vladimir Kramniki geridə qoyaraq V.Anandla qarşılaşmaq hüququ qazanmışdır.
Bölmənin digər xəbərləri
