MƏHKƏMƏ-HÜQUQ ŞURASININ İCLASI KEÇİRİLMİŞDİR
AZƏRTAC xəbər verir ki, Məhkəmə-Hüquq Şurasının növbəti iclası keçirilmişdir. İslasda dövlət başçısının ədalət mühakiməsinin səmərəliliyinin artırılması, məhkəmələrdə icra və əmək intizamına ciddi əməl edilməsi barədə tapşırıqlarının yerinə yetirilməsi üzrə həyata keçirilən kompleks tədbirlərin nəticələrindən danışılmış, bildirilmişdir ki, işdə yol verilən bir çox nöqsanların qarşısı alınmış, yuxarı instansiya məhkəmələrinə şikayətlərin sayı xeyli azalmışdır. Bununla belə, bəzi hakimlər tərəfindən qanunvericiliyin tələblərinin pozulması hallarının hələ də davam etdiyi vurğulanmışdır.
Şuranın iclasında Bakı Şəhər Sabuncu rayon məhkəməsinin hakimi Arzu Əbilhəsənov barədə intizam icraatına baxılaraq qanunvericiliyin tələblərini kobudcasına pozduğuna görə ona töhmət verilmişdir. Həmçinin, iclasda qanunvericiliyin tələblərinin pozulması hallarına yol verdiklərinə görə Ədliyyə Nazirliyinin və Apellyasiya Məhkəməsinin müraciətləri əsasında 3 hakim barədə intizam icraatı başlanılmışdır.
Bölmənin digər xəbərləri
