“MƏHKƏMƏ VƏ HÜQUQ İSLAHATLARI” LAYİHƏSİ ÇƏRÇİVƏSİNDƏ
Azərbaycanda inzibati-hüquqi sahədə həyata keçirilən islahatlara kömək məqsədi ilə Milli Məclisdə Almaniya Texniki Əməkdaşlıq Cəmiyyətinin (GTZ) və Avropa Şurasının iştirakı ilə işçi qrupu yaradılmışdır. Qrupun tərkibinə Milli Məclis Aparatının rəhbəri Səfa Mirzəyev, parlamentin İnzibati və hərbi qanunvericilik şöbəsinin müdiri Nizami Səfərov, GTZ-nin “Keçid dövrü ölkələrində hüquq islahatları” layihəsinin rəhbəri, Bremen Universitetinin professoru Rolf Kniper, bu universitetin professoru Gerd Vinter və digər tanınmış hüquqşünaslar daxildir.
GTZ-nin layihə bürosunun mətbuat üçün yayılmış məlumatında deyilir ki, sentyabrın 8-dən 17-dək işçi qrupunun üzvləri Bremen və Strasburqa işgüzar səfər edərək və Avropada, o cümlədən Almaniyada mövcud inzibati qanunvericiliklə, inzibati orqanların və məhkəmə orqanlarının təcrübəsi ilə yaxından tanış olacaqlar. Bundan başqa, Azərbaycandan olan hüquqşünaslar işçi qrupunun GTZ-dən və Avropa Şurasından olan üzvləri ilə fikir mübadiləsi aparacaq, qanun layihələrinin işlənib hazırlanması məsələlərini ətraflı müzakirə edəcəklər.
Almaniyalı hüquqşünaslar 1997-ci il dekabrın 8-də Azərbaycan və Almaniya hökumətləri arasında imzalanmış Sazişə uyğun olaraq, ölkəmizdə məhkəmə-hüquq islahatlarına yardım göstərilməsini davam etdirəcəklər.
Bölmənin digər xəbərləri
